Assammik arsartartut Danmarkimi unammisartunngortut
Assammik arsartartorpassuit Nunatsinnit Danmarkimut nuunniarlutik aalajangerput. Tassami Nykøbing Falster Håndboldimi unammisartunngussapput
Kalaallit inuusuttuaqqat qulingiluat assammik arsartartut Nykøbing Falster Håndboldimi unammisartunngorput.
Tassani timersoqatigiiffimmi Lykke Frank Hansen unammisartooreerpoq, arnani pitsaanerni unammisartuni Jakob Larsen sungiusaasuulluni.
Arnat inuusuttut arfineq pingasut kiisalu angut ataaseq Nykøbing Falster Håndboldimi unammisartunngorput sapaatip akunnerani matumani. Nuummit Danmarkimut nooqataasut ilaat, 19-nik ukiulik Nukaaka Petrussen Lyberth Sermitsiaq.AG-mit oqaloqatigineqarpoq.
- Nunani allani unammisartunngornissara takorloortuarnikuuara. Aallarnissamut periarfissinneqarama periarfissaq ingerlaannaq tiguara, oqarpoq. Taanna titarnerup killingani unammisartuuvoq, 3.G-imilu atualissalluni ataasinngorpat.
Ataqatigiilluarneq
Kalaalerpassuit aallarteqatigalugit nuannaarutigaa.
- Immitsinnut kaammattorluartassaagut, Nuumminngaanniimmi immitsinnut ilisarisimareerpugut. Nerisassioqatigiittarpugut, soorlu assersuutigalugu ippassaq uagutsinni tamattaalluta grillereqatigiippugut, Nukaaka Petrussen Lyberth oqaluttuarpoq.
Ineriartornissamut periarfissaq
Arnat nunanut allanut unammisartuinut sungiusaasup Johannes Grothip arnat inuusuttuararpassuit Danmarkimut nuunnerat nuannaarutigaa.
- Assammik arsarnerup tungaatigut maanna piffissanngorsimavoq alloriaqqinnissamut. Maanna suli ineriartorluarsinnaalissapput, inuttut aamma qularnanngitsumik ineriartuutigilluartussaavaat, oqarpoq.
Nuannaartunartuusut oqaatigaa.
- Aamma sapiissusertik nuunnerminnut atatillugu takutippaat. Inuusuttunik allanik aamma misiliisitsilerusutitsinissaat neriuutigaara. Nunatsinni arnat tungaatigut timersuut ineriartorluarpoq, tassami ukiuni kingullerni inuusuttut aallunneqarluarput. Taamaattumik qularnanngilaq nunanut allanut unammisartunut soorunami sunniuteqarluassaaq, imaassinnaasormi ukiuni tulliuttuni inuusuttut allat aamma malinnaasut. Taamaattoq piffissaq eqqortoq artorlugu nuuttoqartariaqarpoq, piareersimasariaqarpoq nuunnginnermi, taamaattumik unammisartut angajoqqaavilu oqaloqatigilluaqqaarneqartariaqarput nuunnginnermi, Johannes Groth oqaluttuarpoq.
Unammerngaarnissaq
Nykøbing Falster Håndboldip unammisartuisa aappai (2. hold) aamma U19-mi unammisartui imminnut unammissapput marlunngorpat.
- Soorunami pissangalaarpunga unammeqataaqqaarnissannut, taamaattoq unammeqatigisartakkatta sungiulluarnissai qilanaareqaara.
- Ukiorpassuarni maaniinnissara neriuutigaara, siunissami Nykøbing Falster Håndboldip unammisartuini pitsaanerni unammisartunngorusullunga siunissami.