Assammik arsartartoq Savalimmiuni unammisartunngorpoq

Ivâna Meincke Savalimmiunut nuunniarluni aalajangerpoq.

Titarnerup sinaani unammisartuusup Savalimmiuni timersoqatigiiffimmi Vestmanna-mi unammisartunngorniarluni aalajangerpoq. Tassani Ingi Olsen sungiusaasutut ikiortaavoq, Ivâna Meinckelu sapaatiuppat unammeqataarngaassalluni.

Ineriartornissamut periarfissat

- Savalimmiunut nuukkusunnginnersugut decembarimi aperitippugut angutaatigalu, arsaattartoq Nukannguaq Zeeb. Nunanut allanut nuunnissatsinnut aalajangiussereeriaratta Savalimmiunut nuunnissatsinnut akuersivugut. Maani ineriartornissamut periarfissaqarluarama neriulluarpunga, Ivâna Meincke, maanna tassa GSS-mi unammisartuujunnaartoq, Sermitsiaq.AG-mut oqarpoq.

Sungiusarnerit nuannarai

Savalimmiunut januaarip aappaani tikipput, Ivâna Meincke maanna unammeqatigisartagaligassani sungiusaqatigillattaareerlugit.

- Sungiusimasannit sungiusarnerit allaanerupput. Sungiusaasoq ataqqineqarneruvoq, unammisartut tamarmiullutik tamaviaarlutik sungiusaqatigiittarlutik. Nukittunerulernissamik unammisartut anguniagaqarnerujussuupput, taamatullu sungiusarnissaq maqaasinikuullugu oqarusuppunga. Sungiusarnerit tamarmik pissarsiaqarfiusarput, unammisartut qiimallutillu kaammattoqatigiinnerujussuupput. Taamatut sungiusarneq kingullermik Gudme HK-mi unammisartuullunga misigaara, assammik arsartartoq 24-nik ukiulik, Vestmanna-mi unammisartutut ippassaq ilisaritinneqartoq, oqaluttuarpoq.

Unammisartunut kaammattuut

Unammisaqattaartalernissami qilanaaralugu oqarpoq.

- Maanngarpunga neriuutigalugu unammisaqattaaqataasassallunga, aamma unammisartoqatinnut tunniussassaqarluarlunga malugaara. Nunanut allanut unammisartuni aamma ineriartortitseqataarusuppunga, maanimi amerlasooriarlunga unammisussaavunga. Kalaallit Nunaanni unamminerit amigaataasorujussuupput, uannullu ukiumut ataasiarluni GM-ertarneq naammakkunnaarnikuuvoq. Unammisartoqatikka allat nunanut allanut nuunnissaat neriuutigaara, unamminerimmi amerlasuut ineriartuutaasarput, Ivâna Meincke oqarpoq.