Assammik arsartartoq Danmarkimi pitsaanerit akornanni unammeqataavoq
22-nik ukiulik Marxwell Otiri Frederiksen Skjern Håndboldip sungiusaatigalugu unamminerani unammeqataavoq. Taassuma pitsaanerit akornanni unammisartuulernissani siunnerfigaa.
Assammik arsarnermi nunarsuarmi pissartanngoniuttoqarnerani Marxwell Otiri Frederiksen Skjern Håndboldip sungiusaatigalugu unamminerani ataaseriarluni unammeqataavoq.
Danmarkimi pitsaanerit akornanni unammisartuulernissani sukataarutigaa. Taamaattoq anguniakkani angussaguniuk sukataartariaqarluni ilisimavaa.
- Danmarkimi pitsaanerit akornanni unammisartunngorusuppunga, assammik arsartalerama tamanna angunialerpara, Marxwell Otiri Frederiksen Sermitsiaq.AG-mut oqarpoq.
Skjern Håndboldimi pitsaanerit akornanni unammeqataanini pissarsiaqarfigilluarpaa, siunissamilu ataavartumik unammisartunngorusulluni.
Inissisimaffia allanngortoq
Skive Håndboldimit Skjernimut aasaq unammisartunngorpoq. Viborgimi aamma Skivemi venstrebackimi inissisimasaraluarpoq, nooreernermili kingorna venstrefløjinngorluni.
- Tassani sukkassusera periataallaqqissuseralu atorluarsinnaavakka, aamma siuariartorlunga malugaara. Taamaattoq suli pitsaanerulersinnaallunga malugaara, teknikkikkut piginnaasakka aamma unamminermi paasinnittaasikka pitsaanerulersinnaapput suli, oqaluttuarpoq.
Marxwell Otiri Frederiksen Nuummi inuuvoq, GSS-imi siornatigut unammisartooreerluni.
Anguniakkani angorusuppaa
Marxwell Otiri Frederiksenip takorluukkani sukataarutiginiarlugu oqarpoq.
- Uggornaraluartumik arlaleriarluta takoreerparput kalaaleqatigut Danmarkimut unammisartunngoriarlutik Nunatsinnut uteqqiinnartartut. Kalaallit sapinngitsut takutikkusuppara, nalunngilara sukataarnikkut tamanna angusinnaallugu, tassami pitsanngornerorusullunga sukataartuarpunga.
- Soorunami Nuummut angerlalaartarneq nuannarisarpara, aavarneq soqutigisarilluarpara. taamaattoq maani Danmarkimiiginnartariaqartarpunga sungiusaqataarusuttarama unammeqataallungalu. Anguniagara angoqqaartinnagu tunniutiinnarnavianngilanga, Marxwell Otiri Frederiksen oqarpoq.
Assammik arsarnermi kalaallit angutitaat nunarsuarmi pissartanngorniunnernut siunissami annguttalerumaartut qularutiginngilaa. Siunissami VM-imut peqataaqataajumaarluni neriuutigaa.