Assammik arsarnermi tusaamaneqartut Nuummukassapput

Pan Amerikanske Mesterskabeqarnissaanut atatillugu assammik arsartartut nunani allani tusaamaneqarluartut Nuummi unammersuaaqataassapput

Diego Simonet assimi takuneqarsinnaavoq

Assammik arsarluni VM-imut anngunniunneq Nuummi juunip 16-ani aallartissaaq.

Nunani allani unammisartut tusaamasat Nuummi unammeqasaasussaapput. Kikkut maluginiassavagut? Tamanna pillugu nunanut allanut unammisartuusimasoq arnanullu nunanut allanut unammisartuinut sungiusaasoq Johannes Groth tamanna pillugu Sermitsiaq.AG-mit oqaloqatigineqarpoq.

- Unammersuaarnermi kina nuimanerpaajussava?

- Argentinamioq Diego Simonet. Frankrigimi Montpellierimi unammisartuuvoq, Champions Leaguemi Final Foureqataasussaalluni. Angivallaanngitsuuvoq kisianni sukkasoorujussuuvoq. Assammik arsartunik soqutigisaqartuulluni una isiginnaassallugu soqutiginarluinnaqqissaartuuvoq. Kingullermik ajoqquseqqanini pissutigalugu Pan Am-imi peqataanngilaq, Johannes Groth oqarpoq.

Brasiliamiu Rogerio Moraes Ferreira Pan Am-imut peqataannginnermini aamma Final Fourimi peqataassaaq. Taanna Makedoniami Vardar Skopje-mi unammisartuuvoq.

- Tassunga atatillugu suna maluginiassavarput?

- Nukittoorujussuuvoq, kalaallit unammisartuinit anginerungaatsiartuuvoq. Brasiliap saassussinerani illersuineranilu initoorujussuussaaq, titarnerup killingani unammisartuuvoq, Johannes Groth oqarpoq.

Chile-miut qatanngutigiit Erwin aamma Emil Feuchtmann maluginiagassanut ilaatippai.

- Erwin Feuchtmann Tysklandimi Gummersbach-imi unammisartuuvoq qatanngutaa Emil Frankrigimi Nancy-mi unammisartuulluni. Kalaallit Chilemut unammeriataassagunik unammisartut taakku sianigeqqissaartariaqarput, Johannes Groth oqarpoq.

Powered by Labrador CMS