Assammik arsarnermi GM nutaaq aallartippoq

U-18-it assammik arsarlutik unammersuarneranni unamminerni maannamut naammassisuni amerlasuunik isertitsisoqartarpoq. GSS Nuummeersoq aamma SAK Sisimiuneersoq aallartilluarput. Sisamanngornermi unamminerit aalajangiisuussapput kikkut tallimanngornermi finalernissaannut.

Assammik arsartartut inuusuttut arlallit sapaat ilanngullugu Nuummi inersimasuni pissartanngorniuteqataasut pissartanngorniunnermut tullermut ingerlatiinnangajak aallarput. Timersoqatigiiffk SAK U-18-it pissartanngorniunnerannik aaqqissuisuuvoq. Arnani angutinilu GSS aamma SAK siuartuugallarput. Kâgssagssummiut angutitaat ataasiaannarlutik unamminikuupput GSS Nuummeersoq 33-33-mik naligiiginnarfigalugu. Kâgssagssuk sisamanngornermi marloriarluni unammissaaq finalemullu anngunnissamut periarfissaqarluni.

Peqataasinnaajunnaartut

U-18-it pissartanngorniunneranni arnani iligiit sisamaannaat peqataapput taakku sisamaat tassaallutik holdfællesskabimik taaneqartut.

- Arnani iligiit marluk peqataasinnaajunnaarlutik nalunaarnikuupput taamalu iligiit unammisussat pingasuinnanngorlutik. Iligiit assigiinngitsut sisamanit ikinneruppata pisortatigoortumik pissartanngorniuttoqarsinnaanngitsoq Kalaallit Nunaanni Timersoqatigiit kattuffiata GIFip malittarisassaani allassimavoq, Kalaallit Nunaanni assammik arsartartut kattuffianni siulittaasoq Nuka Berthelsen Sermitsiaq.AG-mut nassuiaavoq.

Taamaammat iligiit Holdfællesskab Nunatta qeqqaneersunik arsartullit pilersinneqarput pisortatigoortumik unammersuartoqarsinnaaniassammat. Angutit iligiit tallimat U-18-ni unammersuaqataapput.

U-18-it Sisimiuni GM-qarnerat tallimanngornermi naammassissaaq bronzennanniuttoqarlunilu finalertoqassammat.

Isertitsinerpaat inissinnerannullu allassimaffiit linkit talerpianiittut atorlugit aasinnaavatit

Unamminernit Jens Karlsenip assilisai angusat ataanni takusinnaavatit

Aajuku marlunngornermi pingasunngornermilu angusat:
Kâgssagssuk – Nagtoralik (angutit) 27-28
SAK – Holdfællesskab (arnat) 34-23
GSS – Kâgssagssuk (arnat) 37-19
GSS – Norsaq (angutit) HC 37-30
SAK – Nagtoralik (angutit) 29-24
SAK – Norsaq HC (angutit) 27-21
GSS – Kâgssagssuk (angutit) 33-33
GSS – Holdfællesskab (arnat) 31-12
SAK – Kâgssagssuk (arnat) 36-22
Norsaq HC – Nagtoralik (angutit) 31-33
SAK – GSS (angutit) 20-23

Aajuku sisamanngornermi unamminissat:
Nal. 13.00 Kâgssagssuk – Norsaq HC (angutit)
Nal. 15.00 Kâgssagssuk – Holdfællesskab (arnat)
Nal. 17.00 GSS – Nagtoralik (angutit)
Nal. 18.30 SAK – GSS (arnat)
Nal. 20.30 SAK – Kâgssagssuk (angutit)