assammik arsarnermi GM
Assammik arsarnermi GM-mi pikkunartumik unammilersut
Inersimasut assammik arsarlutik pissartanngorniunneranni GSS-ip angutitai arnartaalu soorlu pissartanngoraluttualersut
Assammik arsarluni pissartanngorniunnerni Nuummi pisuni unamminerit pingasunngornermi pisussat pissanganarsinnaalluarput. Angutit mellemrundeqarnissaannut GSS anngutereerpoq iligiillu allat mellemrundemi peqataanissamut inissat sisamaasu anguniarsaraat.
Atuaruk: Assit: GMip Nuummi ammarneqarnera
GSSip angutitai Nuummeersut pulje A-mi ajugaasussanngiorput. Tamanna paasinarsivoq marlunngornermi unnukkut SAK-mut Sisimiuneersumut 16-35-mik ajugaareersut. Maanna Norsaq HC Aasianniik, K-33 Qaqortumiik aamma SAK Sisimiuniit mellemrundemi pulje A-miit inissap aappaa anguniarsaraat.
Pingasunngornermi ualikkut Norsaq HCp SAK Sisimiuneersoq unammissavaa. Aasiammiut marlunngornermi K-33-mut Qaqortumeersumut 34-29-mik ajugaapput SAK-mullu ajugaasinnaagunik mellemrundemut ingerlaqqissallutik. SAK-li ajugaassappat SAKp aamma K-33p sisamanngornermi unamminissaat aalajangiisuussaaq kikkut mellemrunde-mut GSS annguteqatigissaneraat.
Pikkunartoq
Pingasunngornermi unamminerit naggaserlugit GM-mi aliannaarutaasartut ilaat pissaaq. Tassaavoq angutini NÛKp aamma Nagdlúnguup Ilulissaneersup pulje B-mi ajugaanniunnissaat. Taakku tamarmik annertuumik QNQ-mut ajugaareerput mellemrundemullu anngunnissartik qulakkereerlugu. Uanili unamminissami ajugaasut mellemrundemut pointinik marlunnnik nassataaqartussaapput.
Ajorsartut mellemrundemi unamminerat sisamanngornermi aallartissaq ajugaasullu mellemrundeanut annguttut sisamanngornermi qasuersaariarlutik tallimanngornermi aallartissallutik.
Arnat peqataasut tamarmik immikkut unammipput. GSS tassani aallartilluarpoq maannalu apeqqutaaginnalerpoq kikkut finalemi unammiumaarneraat. Arfininngorpat SAKp Sisimiuneersup aamma NÛKp Nuummeersut aalajangiisuussagunavippoq kikkut finalemut annguteqataanissaannut. Pingasunngornermi ualikkut Kâgssagssuk aamma Nagdlúnguak unammissapput tassanilu ajugaasut bronzennanniunnermut anngutissapput.
Talerpiatungaani linki atorlugu inissinnerat isertitsinerpaallu allassimaffiat aasinnaavatit
Aajuku marlunngornermi angusat:
SAK – Nagdlúnguak (arnat) 28-12 (15-7)
K-33 – Norsaq HC (angutit) 29-34 (14-20)
NÛK – Kâgssagssuk (arnat) 32-15 (18-4)
SAK – GSS (angutit) 17-36 (7-14)
QNQ - NÛK 16-35 (angutit) (11-14)
Aajuku pingasunngornermi unamminissat:
Kl. 14.30 Kâgssagssuk – Nagdlúnguak (arnat)
Kl. 16.00 SAK – Norsaq HC (angutit)
Kl. 17.30 GSS – NÛK (arnat)
Kl. 19.00 K-33 – GSS (angutit)
Kl. 20.30 Nagdlúnguak – NÛK (angutit)
GM pillugu allaaserisat uani atuakkit