Assammik arsarneq: VM-imut anngunniunnissamut aalajangiinissaq kinguartinneqarpoq
Angutit VM-imut anngunniunnissaanut atatillugu Puerto Rico aaqqissuisuujumalluni nalunaarnikuuvoq. Ilumut unammersuaarnissaq aaqqissuunneqassanersoq suli nalunarpoq
North America and Caribbean Handball Confederationimi pissartanngorniunnissaq, VM-imut anngunniunnerutigisoq, ilumut aaqqissuunneqassanersoq suli nalunarpoq.
Unammersuaartitsinermut ataatsimiititaliami siulittaasup Kurt Lauritsenip tamanna Sermitsiaq.AG-mut ilisimatitsissutigaa.
Puerto Rico aaqqissuisuujumasoq
- Mexico unammersuaarnissamut siullermik aaqqissuisuusussatut nalunaarnikuugaluarpoq, covid19-ili pissutaalluni aaqqissuisussatut tunuarpoq, ilaatigut unammiuaarfissap Olympiske Trænings Centerip napparsimavittut atorneqarnera pissutaalluni. Nunanik allanik aaqqissuisussanik nassaarniarneq ajornakusoornikuuvoq pissutsit assigiinngitsut peqqutigalugit, oqarpoq,
Puerto Rico aaqqissuisinnaalluni nalunaaruteqarpoq tamatuma kingornatigut.
- Timersoqatigiit suliniaqatigiiffiisa aaqqissuiniarneq akueraat, taamaattoq peqqinnissaqarfiit tungaatigut suli akuerineqarnani. Unammersuaarnissamut aaqqissuisinnaanersoq aggustip 28-ani aalajangerneqartussaagaluarpoq, taamaattoq aalajangerniarneq ulluni 14-ni kinguartinneqarpoq, Kurt Lauritsen ilisimatitsivoq.
Corona ajornakusoortitsivoq
Nunat VM-imut peqataassagunik anngunniuteqqaartariaqartut nunat tamalaat assammik arsartartut kattuffissuata IHF-ip naqissuserlugu aalajangernikuuaa.
- Nuna ataaseq amerikap avannaanit caribiamiillu VM-imut annguttussaavoq. Nunat arlaqartut peqataanissaat suli nalornissutigineqarpoq, tassunga pissutaavoq sungiusaqatigiissinnaannginnerit, killilersuinerit coronavirusilu pissutaalluni mattuteqqagallarnissat pissutaallutik.
- USA aamma Canada Europami unammisartoqarnersaapput, nunaminnukarunik mattuteqqagallartariaqartussaallutik, taamaattumik sungiusaqatigiissinnaanerat eqqugaalluni, Kurt Lauritsen ilisimatitsivoq.
Nunat arlallit tamaatiinnartut
Pissutsit assigiinngitsut pissutaallutik Den Dominikanske Republik, Cuba aamma Mexico unammersuaarnissamut peqataasinnaanatik nalunaareerput.
VM-imut anngunniunnissaq kingusinnerpaamik novembarip aappaanit qulingata tungaanut anngunniuttoqassasoq IHF nalunaareerpoq.
- Puerto Rico unammersuaarnermut aaqqissuisinnaanngippat IHF aqqutigalugu suna pitsaanerpaajussanersoq ujartorneqassaaq, Kurt Lauritsen oqarpoq,