Assammik arsarneq: Nunarput nunanit allanit unammiartunik tikilluaqqusinissamut piareerpoq

Nunanit allanit assammik arsarlutik nunatsinnut unammiartussat, sungiusaasut, dommerit peqataasussallu allat Nuummut junip aallartinnerani tikissapput, VM-imut anngunniunnissamut peqataassallutik. Tikeraartussanut Nuuk piareertoq, assammik arsartartut kattuffianni siulittaasoq oqarpoq.

Arnat nunanut allanut unammisartut assammik arsarlutik VM-imut anngunniunnissaannut pilersaarusiorneq naammassilluinnarpoq. Nuummut tikerartussat, assammik arsartartut, sungiusaasut dommerillu 150-t missaanniittut, 5.-11. junimi unamminerni peqataasussat tikilluaqquneqariaannanngorput.

USA, Canada, Mexico, Cuba aamma Kalaallit Nunaat Nuummi assammik arsartarfimmi naapissapput.

- Assammik arsariarlutik tikittussat 150-it missaasa tikinnissaannut pisariaqartut tamarmik inissereerput. Pilersaarusiornerup aallartinniarnera ajornakusoorsimavoq, nunatsinnili unammisoqarnissa aalajangiunneqariartoq pilersaarusiorneq sukkalluinnartumik ingerlavoq. Assammik arsarnerit ingerlannissaat tassa tullinnguupput, Timersoqatigiit Assammik Arsartartut Kattuffianni, TAAK-imi siulittaasoq Carsten Olsen Sermitsiaq.AG-mut oqarpoq.

Aningaasartuutit ajunngitsumik ingerlapput

Assammik arsartartut kattuffiat unamminissamut pilersaarusiorneq, aningaasartalerneqarnera februarimi inissilluarmat, aatsaat aallartissinnaasimavaat. Aningaasartuutit missingersuutinut naapertuuttumik atorneqartut, siulittaasoq ilisimatitsivoq.

- Missingersuutit malippagut, taamaattumik pilersaarusiorneq ajunngivissumik ingerlavoq. Nunat sisamat nunatsinnut unammiassammata, tamanna soorunami akikinneruvoq. Angallanneri, najugaqarnissaat nerisaqarnissaallu piareereerput, aningaasanullu missingersuutigut suli malippagut, siulittaasoq oqarpoq.

Ukrainemiit dommerit nunatsinnukassasut

Unamminerni dommerissat maanna inissereerput. Cubamiit nunatsinniillu marlukkaartunik dommereqassaaq. Dommereqatigiittartut Ukrainemeersut aamma tikissapput, TAAK-illu tamanna nuannaarutigaa:

- Ukrainemiit dommereqarnissarput soorunami nuannerpoq. Dommerit atugassagut nunat tamalaat akornanni unammisoqartillugu dommeriusarput. Unamminerit pissanganarluinnassapput, dommerillu pitsaalluinnarlutik, Carsten Olsen oqarpoq.

Assammik arsartartut kattuffiata naatsorsuutigaa VM-imut anngunniunnerit sioqqullugit, unamminerit nalaanni kingornalu kajumissutsiminnik suleqataasut 300-t missaat pisariaqartissallugit. Carsten Olsen ilisimatitsivoq suliffeqarfiit kajumissutsiminnillu suliaqartut suliamik kivitseqatigiinnissamut maanna ingerlallualereersut.

Powered by Labrador CMS