Assammik arsarneq: Niviarsiaqqat nukappiaqqallu unammilerput
Meeqqat U10 aamma U12 assammik arsarlutik sapaatip akunnera una unammillutik aallartipput, unammisullu ilaat siunissami nunanut allanut unammisartunngornissaat ilimanarluinnartoq, Børne Cup 2023-mik aaqqissuisut isumaqarput.
Meeqqat assammik arsarlutik unammineri maanna aallartipput. U10 aamma U12 niviarsiaqqat nukappiaqqallu sisamanngornermi 18. maj unammillutik aallartipput.
Sisamanngornermi nal. 12.00 unammineq siulleq aallartittoq, Børne Cup 2023-mik aaqqissuisut GSS ilisimatitsipput. Sapaatip tungaanut unamminerit katillugit 40-t ingerlanneqassapput, sapaammilu pissartanngorniutivittoqassalluni.
- Siunissami nunanut allanut unammisartunngorumaartussat Børne Cup 2023-mi maanna peqataapput, Rita Egede GSS-imiit oqarpoq.
Nerisassat peqqinnartut pillugit paasititsiniaaneq
GSS ilisimatitsivoq holdit 19-it peqataasut.
Ukuusut:
- K-1933, Qaqortoq
- Nagtoralik, Paamiut
- NÛK, Nuuk
- GSS, Nuuk
- Kagssagssuk, Maniitsoq
- SAK, Sisimiut
Holdit ukioqatigiiaannut kiisalu nukappiaqqanut niviarsiaqqanullu agguataarsimapput.
Meeqqat 225-t missaat Børne Cup 2023-mut peqataapput. Assammillu arsarnerinnaq ingerlanneqassanngilaq. Nerisassammi peqqinnartut pillugit meeqqat aamma ilinniartinneqassapput:
- GSS Aalasa peqatigalugu nerisassat peqqinnartut pillugit oqalugiartitsissaaq, meeqqallu peqqinnartunik nerisassanik sassaallerfigineqassallutik, GSS ilisimatitsivoq.
Børne Cup 1996-imili ingerlanneqartalerpoq, Nuuk, Maniitsoq Sisimiullu paarlakaallutik aaqqissuisuusarlutik.
Sapaammi nal. 16.10 finalit aallartissapput.
