Assammik arsarneq: Maniitsumi meeqqat unammilersut
Meeqqat U10-mi aamma U12-mi assammik arsartartut sapaatip akunnerata naanerani unammisinneqalerput. Assammik arsartartut peqatigiiffii katillugit sisamat imminnut unammisaqattaassapput nutaatullu meeqqat timersortartutut inooriaaseqarneq pillugu ilinniartinneqassallutik.
Meeqqat katillugit 160-it assammik arsarlutik Maniitsumi tallimanngornermiit sapaat, tassa 27. juni ilanngullugu unammisinneqassapput. Peqataasussallu tassaapput GSS aamma NÛK Nuummeersut, Kâgssagssuk Maniitsumeersut aamma SAK Sisimiuneersut.
-Børnecup tallimanngorpat nalunaaqutaq ulloqeqqanut aallartissaaq. Siullertut meeqqat timersortartutut inooriaaseqarneq aammalu iluamik nerisaqartarnissaq qanoq timersornermi pingaaruteqartiginersoq pikkorissarfigissavaat, Nuka Ole Berthelsen, Kâgssagssuk-mi allatsi ataqatigiisaarisorlu oqarpoq.
Peqatigiiffiit allat peqataasinnaanngitsut
Meeqqanut unammisitsinerit siullerpaamik 1995-imi aallartinneqarpoq. Meeqqat assammik arsartartut Sisimiuneersut, Maniitsumeersut Nuummeersullu kajumissaarniarlugit arsallaqqinnerulertinniarlugillu unammisinneqartalerput. Unamminerillu ilaanni meeqqat kujataaneersut avannaaneersullu aamma peqataasarput.
Ukioq manna K-33 Qaqortumeersut aamma Norsaq HC Aasianneersut peqataasussaagaluarput. Peqatigiiffiillu takkussinnaasimanngillat.
- Ajoraluartumik K-33 peqataasinnaasimanngilaq kommunemiit tapiiffigineqarsinnaasimannginnamik. Norsaq HC-ilu tikisinnaasimanngillat angallanniarnerminni ajornartooramik, Nuka Ole Berthelsen oqarpoq.
Pilersaarut imaqarluartoq
Meeqqat 160-it sapaatip akunnerata naanerani pilersaarutaat imaqarluarpoq. Unamminerit timersortartutut inooriaaseq pillugu pikkorissarneqareerunik unamminissaat aallartinneqassapput. Pikkorissaanermi ilaatigut nunanut allanut assammik arsartartuni unammisartoq Akutaaneq Kreutzmann meeqqanut saqqummiisalluni.
Pilersaarutit:
- Tallimanngorneq: Aalasa projekt nalunaaqutaq: 12-14
- Unamminerit siulliit aallartissapput nalunaaqutaq: 15:00 naammassissapput nalunaaqutaq 19:00
- Arfininngornermi unamminerit: nalunaaqutaq 10:00-14:00 – unikkallarneq – 16:00 – 19:00
- Sapaat (finaalit): nalunaaqutaq 10:00-15:00