Skip to main content

Assammik arsarneq: Kreutzmannip arsartarnini Japanimi nangissavaa

Assammik arsartartoq nunanut allanut unammisoartoq Akutaaneq Kreutzmann misigisassatsialaasinnaasumut ingerlangajalerpoq

Ukiorpassuarni danskit pissartanngorniuffianni unammisartuunerup kingorna nutaamik pisoqarnissaa kissaatigisimavaa, tamannalu Akutaaneq Kreutzmannimut piviusunngulerpoq.

- Nutaamik misiliillunga nunanut allanukarusuppunga, Akutaaneq Kreutzmannip siorna arlaleriarluni tamanna utertarpaa. GOG-mi, Ribe-Esbjerg HH-mi aamma sæsonini marlunni kingullerni Nordsjælland Håndboldimi unammisartuunerup kingorna misigisassarujussuaq utaqqivoq

Japanimi klubbimut isumaqatigiissusiortoq

Tassami Akutaaneq Kreutzmann japanimi klubbit pitsaanerit ilaannut ukiumi ataatsimi atuuttussamik isumaqatigiissusioqqammerpoq. Klubbip aqqa maanna isertuukkallarpaa. Tassami kalaallimik assammik arsartartumik nunanut allanut unammisartumik isumaqatigiissusiorsimallutik saqqummiussinnginnerminni, klubbip aqutsisui assigiinngitsunik inissitaqaqqaartussaagamik.

Akutaaneq Kreutzmann Japanimit angerlaqqammerpoq. Unammisartut sungiusartarfii alakkaqqammerpai, unammisartut, sungiusaasut allallu ilasseqqammerlugit.

- Japanimi misigisaq nuannerluinnarpoq. Japanimi nalunngilarput nuna torersuusoq. Juulip aallartinnerani Japaniliaqqissaanga sæsonip nutaap aallartisarneqarneranut peqataajartorlunga.

Japanimi assammik arsartarneq

Japanimi assammik arsartartut, arnani aamma angutini pitsassuarmik sungiusarnermut kultureqarput. Klubbit suliffeqarfissuarnit assigiinngitsunit pigineqarput, arsartullu tamarmik suliffeqarfinni taakkunani atorfeqarput. Ligami pitsaanerpaami angutini klubbit qulingiluaapput.

Danskit assammik arsartartut ligaattut qaffasitsiginngilaq.

- Ligap qanoq pitsaatiginera pillugu oqaaseqassaguma klubbitaanni unammeqqaalaartariaqassaanga, Akutaaneq Kreutzmann oqarpoq.

Japanimiut assammik arsartartut Danmarkimi ilisimaneqaatigineruaat, Nykøbing Falster Håndboldimi unammisartut pingasut Ayaka Ikehara, Yui Sunami aamma Sakura Hauge.

Sungiusarluni unamminerit marluk

Kalaallit Nunaata kingullermik sungiusarluni unamminermi Japan 2012-imi unammivaa. Unammineq Danmarkimi pivoq, taamanilu Japan 29-28-mik ajugaavoq. Taamanikkornit Japanimi assammik arsartarnermi annertuumik pisoqareerpoq. Sungiusaasut pikkorissut Europamit tikisinneqarsimapput. Unammisarfinnullu pitsaasunut aningaasaliisoqarnikuuvoq. Soqutiginninneq annertuvoq.

Decembarimi arnat nunarsuarmi pissartanngorniunnissaat maanna Japanimi qilanaarineqarpoq. Japanimi arnat nunanut allanut unammisartut qallunaamit Ulrik Kirkelymit sungiusarneqarput.

Nunanut allanut unammisarneq

Japanimi arsartartuunissaq Akutaaneq Kreutzmannip nunanut allanut unammisartuuneranut allanngortitsinavianngilaq.

- Sungiusaqatigiinnerit assigiinngitsut pinnginnerani bilitsit allallu inissiaartarnissaat taamaallaat isumagiinnartassavara, Akutaaneq Kreutzmann naggasiivoq.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER