Assammik arsarneq: Kalaallit Nunaat VM-imut peqataassanngilaq
Nunarsuarmi pissartanngorniunnissamut anngunniunnissaraluaq taamaatiinnarneqarpoq. Nunat tamalaat assammik arsarnermi kattuffiat IHF aalajangerpoq USA VM-imut anngutissasoq.
Amerika avannarleq aamma Caribia sinnerlugu USA Nunarsuarmi assammik arsarnermi nunarsuarmi pissartanngorniunnissamut peqataassasoq IHF aalajangerpoq.
Taamaasilluni kalaallit angutitaat nunarsuarmi pissartanngorniunnermut peqataasinnaajunnaarput. Nunarsuarmi pissartanngorniunneq Igitsinimi januaarimi ingerlanneqassaaq.
Aalajangiinermut tunngavilersuutit
- Nunarsuarmi assammik arsarnerup ineriartorneranut USA peqataavoq, suliniutinilu assigiinngitsuni peqataalluarnera pissutaalluni VM-imut anngutsinneqarlutik, NACHC-mi unammersuaarnermut ataqatigiissaarisoq Kurt Lauritsen oqarpoq.
Pan-american gamesimi anngunniunnermi kingullermi USA-p angusarissaarnera aamma VM-imut anngutsinneqarnerannut tunngavilersuutaavoq.
Aalajangerneq pakatsissutigineqarpoq
IHF-imit aalajangiineq nunanut allanut unammisartoq Minik Dahl Høegh pakatsivoq.
- Taamatut aalajangertoqarnera alianarpoq. VM-imut peqataasartut 32-nik amerlineqarnikuupput, ajugaaffigisartakkagut soorlu Uruguay aammalumi USA anngupput.
- Ukiorpassuarni VM-imut peqataaniarluta sungiusarnikuuvugut, tassami unammisartutut anguneqarsinnaasuni VM annersaavoq. Taamaattumik anngutsinneqannginnerput pakatsinartorujussuuvoq, Minik Dahl Høegh oqarpoq.