Skip to main content

Assammik arsarneq: Ivâna angusaqarluarusuttunut nuuppoq

Assammik arsarnermi nunanut allanut unammisartoq, Ivâna Meincke, Islandimi timersoqatigiiffimmik isumaqatigiissuteqarpoq.

26-nik ukiulik Ivâna Meincke Savalimmiunit Vestmannamit Islandimut FH Hafnarfjordur nuuppoq.

FH Hafnarfjordur ukioq kingulleq førstedivisionimut nakkaraluartoq klubbi angusaqarluarusuppoq.

- FH Hafnarfjordur Islandimi assammik arsarnermi qaffasinnerpaamik inissisimarusuppoq. Ukiuni pingasuni tulliuttuni pissartanngorusullutillu pokalturneringimi ajugaarusupput, Ivâna Meincke Sermitsiaq.AG-mut oqarpoq.

Pitsaanerulernissamik siunertaqarneq

Taanna FH Hafnarfjorduri ukiuni pingasuni isumaqatigiissuteqarfigaa.

- Pitsaanerpaanngornissaq anguniarlugu klubbimi unammisartut tamarmik sukataartut malunnarpoq. Sungiusaqatigiinnerni sukataartaqaagut, tamanna peqataaffigalugu nuanneqaaq. Uangami aamma pikkorinninngorusuppunga inerneriartortuarumallunga, oqaluttuarpoq.

Nunani allani unammisartuuginnarnissaq

Savalimmiuni unammisaqattaarnerit naammassimmata Nagdlunguak' Ilulissaneersut Kalaallit Nunaanni pissartanngorniunnermi unammeqatigai, tassani bronzinnaqataalluni.

- Taamaattoq nunani allani unammisartuuginnarnissaq aalajangiusimavara, tassami Nunatsinni ukiumut ataasiaannarluni pissartanngorniuttoqartarpoq. Unammisaqattaarnerorusuppunga, taamaattumik Islandimut nuunnissaq aalajangerpara, Ivâna Meincke oqarpoq.

Unammisartut amerlanerusut nunanut allanut unammisartunngornissaat neriuutigaa.

- Soorunami nunamut allamut nuunneq imaannaanngilaq. Tatigisariaqarpoq ilumut siunnerfigisaq iluatsikkumaartoq. Maanna sapaatit akunneri tamaasa unammisassaanga, unammisaqattaarnerit misilittakkanik tunisisarput, soorlu VM-mimut anngunniunnermi siunissami iluaqutaasinnaallutik, oqarpoq. Taanna USA-mi qaammat kingulleq VM-imut anngunniuteqataavoq.

Misigisassarpassuit

Nunani allani unammisartuugissarnissaa nunanut allanut unammisartunut sungiusaasup Anders Friisip nuannaarutigaa.

- Taamatut aalajangernera nuannaarutigeqaara, assigiinngitsunik misigisaqartussanngorpoq. Ulluinnarni Islandimi qanoq sungiusartoqartarnersoq imaluunniit arlaatigut qanoq aaqqissuussaanersoq nalugakku oqaaseqarfigissanngilara. Suut pitsaaffigilernerusariaqarai oqaloqatigiissutiginikuuagut, taakkulu pitsaaffiginerulissagai neriuutigaara, Anders Friis oqarpoq.

OQALLIFFIMMUT TIKILLUARIT
  • Oqallinneq malinnaaffigalugulu peqataaffigerusukkukku cookies akuerissavat: ”accepter cookies”.
  • Pingaarutilik! Malittarisassat nutaat: oqallinneq malinnaavigiumallugu peqataaffigiumallugulu https://www.facebook.com/settings/cookie ataani Valgfrie cookies atuuttussanngortinneqassaaq.
  • Oqaaseqaatit allaffissartaat browserinni aamma mattunneqarsinnaavoq. Browserinni Facebookimi oqaaseqaatinut allaffissat atuutilersinnissaannut ilitsersuut uani atuarsinnaavat.
  • Sermitsiaq.AG atuartartutta akornanni isumaqatigiinngittoqaraluarpalluunniit oqalliseriaatsip pitsaasuunissaanik kissaateqarpoq. Oqallinnermut malittarisassanik unioqqutitsineq mattunneqarnermik kinguneqarsinnaavoq.
  • Oqaaseqaatinik sakkortuunik nalunaarutiginninneq pisinnaavoq "rapporter" toorlugu imaluunniit ”markere som spam” toorlugu.

Forsiden lige nu

SENESTE NYHEDER