Assammik arsarneq: Cuba VM-imut anngunniunnissamut aaqqissuisutut tunuartoq

Kalaallit Nunaanni assammik arsarnermi angutit nunanut allanut unammisartut nunarsuarmi pissartanngorniuttoqarnissaanut ukioq manna anngunniuteqataasussaapput.

Cuba anngunniunnermut aaqqissuisuusussaagaluarpoq. Assammilli arsartartut kattuffiat facebookikkut allappoq, Cuba aaqqissuisutut tunuarsimasoq.

- Ullumi nalunaarfigineqarpugut Cuba aaqqissuisutut tunuartoq. 11.-17. april VM-kval ingerlanneqartussaagaluarluni. Maannamut ilimagineqarpoq Den Dominikanske Republik imaluunniit Mexico aaqqissuisutut inissinneqassasut, kattuffik allappoq.

Peqatigitillugu ilisimatitsissutigineqarpoq, anngunniunnerup sumi ingerlanneqarnissaa pillugu Kalaallit Nunaanni Assammik Arsartartut Kattuffiat qaammammi matumani ilisimatinneqarumaartoq.

Kalaallit assammik arsarnermi angutitaat nunanut allanut unammisartut pingasoriarlutik nunarsuarmi pissartanngorniunnermut ilaasimapput, tassa 2001-imi, 2003-mi 2007-imilu.