Assammik arsarneq: arnat nunanut allanut unammisartut illoqarfinnut arlalinnut tikeraassapput
Septemberip qaammataa tamakkipajaarlugu arnat nunanut allanut unammisartut illoqarfinnut assigiinngitsunut tikeraassapput. Meeqqat inuusuttullu qilanaalereersinnaapput "Mini VM kval"-imut sungiusarnissaminnut.
Nunarsuaq tamakkerlugu arnat assammik arsarlutik pissartanngorniunnermut
anngunniunneq Nuummi Inussivimmi ingerlanneqarpoq, Kalaallit pissartanngorfigisaannik.
Inuiaqatigiit tamatta arnartagut ersaattaappagut, angusaat pillugu.
Taamaalillutillu Norgemut nunarsuaq tamakkerlugu assammik arsarluni unammersuarnermut peqataajartussallutik novemberimi.
"MINI VM kval."
TAAK siulersuisut NunaFonden Unicef-ilu suleqatigalugit pilersaarusiuleruttorpaat arnat
nunanut allanut unammisartut sinerissamut tikeraalaarnissaat.
Uani suliniummi siunertaavoq, illoqarfiit Nuup avataaniittut assammik arsartartut, assammik
arsarnermillu nuannarisallit qanimut arnanik nunanut allanut unammisartunit
naapinneqarnissaat. Tassanilu pingaartipparput arnat nunanut allanut unammisartut
illoqarfimmut ornitaminnut tunniussilluarnissaat.
Pisussani tamatigut nunanut allanut unammisartut meeqqanut inuusuttunullu
sungiusaasassapput unammisitsisarlutillu.
Tamanna ukunani illoqarfinni pissaaq:
- Qaqortoq: 9.-10. September
- Ilulissat: 16.-17. September
- Aasiaat: 16.-17. September
- Sisimiut: 23.-24. September
Maniitsoq Paamiullu pilersaarusiornerat suli ingerlavoq, ullulerneqarumaarlunilu, taamak ilisimatitsivoq Timersoqatigiit Assammik Arsartartut Kattuffiat (TAAK).
