Assammik arsarneq: David Goliath-ilu

Assammik arsarnermi kalaallit angutit nunanut allanut unammisartut kiisalu kalaallit immikkut toqqakkat qallunaat U-21-ni nunanut unammisartui tallimanngorneq, arfininngorneq sapaallu Nuummi Illorsuarmi timersortarfimmi unammissapput. Qallunaat U-21-ni unammisartut juulip qeqqani U-21-ni VM-ertussaagamik Nuummi unamminerit VM-mut piareersaatitut atorniarpaat.

Qallunaat unammisussaat arlalissuit Danmarkimi Håndboldligami unammisartuupput. Juulip 14-aniit VM-qataanissaminni imaannaanngitsunik unammisassaqaramik Nuummi unamminerminni tamaviannguat arsarnissaat ilimanarpoq.

Tamaviaallaqqissut
- Ukiumut sisamariaannarluta naapittarpugut. Taamaammat Nuummi unamminissat sungiusarnissallu atorniarpagut systemet VM-mi atugassatta misiligarnerannut, qallunaat U-21-ni unammisartut sungiusaasuat Henrik Kronborg Sermitsiaq.AG-mut oqarpoq.

Qallunaat kalaallinut immikkut toqqakkanut tallimanngornermi unnukkut unammissapput kalaallillu nunanut allanut unammisartuinut arfininngornermi sapaammilu unammissallutik.

- Arsarluarutta kalaallit unammisartui ajugaaffigisinnaavagut, Kisianni aamma nalunngilarput kalaallit unammisartui tamaviaallaqqissuusut namminnerlu arsarfimminni unammilerunik tamaviaarnissaat naatsorsuutigilluinnarparput. Aatsaat tamaviaaqqaarluta ajugaasinnaavugut, Henrik Kronborg oqarpoq.

U-21-ni VM-rtoqarnissaani Danmark imaannaanngitsunik unammisassaqarpoq. Unamminernimi aallarniutaasuni Tunesien, Frankrig, Angola, Serbien aamma Rusland unammisussaavaat.

Sisamanngorpat Nuummut tikissapput ullukkut sungiusariarlutik unnukkut unammisassallutik.

- Naatsorsuutigilluinnarparput timersortarfissuarmi nuannerluinnartumik isiginnaartut misigititsiumaartut aamma neriuutigaarput amerlasuut isiginnaariarumaartut, Henrik Kronborg oqarpoq.

Unamminerit KNR-TV-kkut toqqaannartumik aallakaatinneqassapput.

Unamminissat:
Tallimanngorneq nal. 20.00 Danmark – kalaallit immikkut toqqakkat
Arfininngorneq nal. 19.00 Danmark – Kalaallit Nunaat
Sapaat nal. 19.00 Danmark – Kalaallit Nunaat