Assammik arsarluni pissartanngorniunneq: Uku semifinalini unammissapput
Assammik arsarluni pissartanngorniunnermi unamminerit marluk pingasunngormat pipput. Tallimanngorneq finalimut anngunniuffiussaaq arfininngornermilu pissartanngorniuttoqassalluni.
Arnani angutinilu assammik arsarluni guldinnanniuttussat holdit marluk ullumi tallimanngornermi maajip tallimaanni paasineqassapput.
Unammineq siulleq nalunaaqutaq ataatsimut pissaaq, tassani Qaqortormiut K-33-p siorna pissartanngortut GSS Nuummeersut unammissavaat.
Taakku piareerpata angutit unammissapput, tassani Ilulissaneersut N-48 siornas pissartanngortut Nuummeersut GSS unammissallugit.
Unamminerit naligiiffiusut
Arnat pingasunngormat unammimmata K-33-p NÛK-llu isiginnaartut aqqaamatittaannguatsiarpaat. Unamminerup immikkoortuani siullermi K-33 siuttuuvoq piffissallu ilaani isertitanik pingasunik siuarlutik. Unamminerli naammassimmat NÛK ajugaavoq, taakku minutsini kingullerni 26-nik isertitsillutik K-33 25-raartoq ajugaaffigaat.
Angutini N-48 NÛK-lu unammimmata aamma pissanganeq annikinnerunngilaq, unamminerummi ingerlanerani naligiiginnangajavimmata. Unammineq naligiiffiulluni 27-27-mik naammassimmat, puljeni unamminerni isertitat kisinneqareermata, N-48-p siorna pissartanngortut GSS-ikkut unammisussanngorpaat.
Arfininngorneq pissartanngorniuffiussasoq
Pissartanngorniunnissamut anngunniunnermi unamminerit siulliit marluk pereerpata unammisassaat tallimanngornerup ualinerani pissapput.
Arnani NÛK Akuleriillu siulliullutik nalunaaqutaq sisamanut unammissapput. Kingorna angutini NÛK-p Qaqortormiut K-33 unammissavaat.
Assammik arsarluni arnani angutinilu Kalaallit Nunaanni pissartat aqagu arfininngornermi maajip arfernani nassaarineqassapput. Arnat nalunaaqutaq 15:30 unammissapput angutillu nalunaaqutaq 17:15 unammissallutik.
Bronzennanniunnerit arfininngorpat ulloqeqqanut aallartissapput.