Assammik arsarluni nunanut allanut unammisartut Danmarkimi katersuutissapput
Angutit nunanut allanut unammisartut Danmarkimi 1. divisionimi unammisartunut marlunnut unammissapput
Assammik arsarnermi nunarsuarmi pissartanngorniunnissamut kalaallit angutitaat aappaagu anngunniunniuttussaapput.
Taamaattumik nunanut allanut unammisartut katerinnissaat pingaaruteqartoq nunanut allanut unammisartunut sungiusaasoq Ingi Olsen isumaqarpoq.
- Anngunnissatsinnut periarfissagissaarpugut, katerisimaartarnigut akuttummata katerisimaarnissarput qilanaaraara. Ukiuni kingullerni sulissutigisimasagut ineriartorteqqinnissaat anguniarlugit katerissaagut, Ingi Olsen Sermitsiaq.AG-mut oqarpoq.
Januaarimi kingullermik nunanut allanut unammisartut kateripput. Tassani Savalimmiormiunut marloriarlutik unammipput.
- Unammisartut sungiusarlutik aallartereersut katerinnissamut qaaqquakka. Danmarkimi nunanilu allani unammisartut aamma peqataassapput, taakku sapaatit akunneri tamaasa unammisartuupput. Kalaallit Nunaanni klubbini sungiusaasut oqaloqatiginikuuakka, tassani sungiusarnerit aallartereersimanersut paasiniarlugu. Timersoqatigiiffiit arlallit suli sungiusarnertik aallartissimanngikkaat ilisimatinneqarpunga. Aavarfiujunnaareeraangat sungiusarnerit aallartikkajunnerusartut ukiuni kingullerni takusareerparput, Ingi Olsen oqarpoq.
Nunanut allanut unammisartut Københavnimi oktobarip 18-anit 25-iat ilanngullugu katerissapput. FIF aamma Ajax København unammissavaat.
Nunanut allanut unammisartunut sungiusaasup unammisartut toqqagarai:
1. Taatsiaq Villadsen, GSS (målmand)
2. Inuk Højgaard, GSS (målmand)
3. Noah John Davidsen, GSS
4. Malik Kleist Andersen, Silkeborg-Voel
5. Akutaaneq Kreutzmann, Toyoda Gosei
6. Marco Geisler, Silkeborg-Voel
7. Nuka Heilmann, GSS
8. Lars Ole Lyberth, GSS
9. Aqqalu Sandgreen, GSS
10. Inuujuk Ostermann-Søholm, GSS
11. Kuutak K. Olsen, GSS
12. Inuk Olsen, GSS
13. Angutimmarik Kreutzmann, TIK Tastrup
14. Minik Dahl-Høegh, Ajax København