sungiusarneq
Assammik arsaattartut Savalimmiuni sungiusarput
Sungiusariarnermit savalimmiormiut klubbiinut pingasoriarluni unammisoqassaaq
Ingi Olsenip nunanut allanut unammisartunut sungiusaasutut Rasmus Larsen ikiortigalugu toqqarneqarnerata kongorna siullermeerluni sungiusarluni katersuuttoqarpoq.
Sungiusarluni katersuuttoqarnerani unammisartut 17-it peqataapput, danskit klubbiini unammisartut Akutaaneq Kreutzmann, Nordsjælland Håndbold, aamma Minik Dahl Høegh, Århus Håndbold, siuttoralugit. Sungiusarluni katersuunnerit Amerikap nunavittaaneersut Nuummi pissartanngorniunnissaannut piareersarnermut atavoq, tassani nunarsuarmi pissartanngorniunnissamut inissat pingasut unammissutigineqassapput.
Minik Dahl Høegh suli ajoquseqqasoq
Nunanut allanut unammisartut unammilerunik nukittunerpaaffimminiissanngillat.
Minik Dahl Høegh piffissami sivisuumi ajoquseqqasimasoq ajoraluartumik peqqissarluni sungiusarnermini ajoqusernerminik nangissimavoq. Siunissami qaninnermi ajoqusernera misissorneqassaaq, Minik Dahl Høeghip qaqugu arsarnissamut piareersinnaanera nakorsat oqaatigisinnaassagunarpaat.
Minik Dahl Høegh Savalimmiuni katersortitsinermi nammineq sungiusqarpoq. GOG-meersoq Frank Mikkelsen katersuunnermi peqataanngilaq.
Marlunngornermit sapaammut
Kalaallit Nunaannit Danmarkimiillu unammisartut ullumi marlunngornermi tikipput, sapaammilu aallaqqissapput. Tassaniinnerminni unammisartut Tórshavnimi Hotel Føroyarimiipput.
Nunanut allanut unammisartut sungiusaasuata Ingi Olsenip Savalimmiuniit Sermitsiaq.AG-mut oqarasuaatikkut oqaluttuaraa, ullormut sungiusarnerit nalinginnaasut saniatigut pingasoriarluni unammisoqassasoq. Neistin, Savalimmiuni siuttuusut, H71 aamma Vestmanna IF unammisartut unammissavaat. Vestmanna IF-imi nunanut allanut unammisartoq Miki Duko Sørensen arsartarpoq.
- Ulloq siulleq Vestmannami unammillutalu sungiusassaagut, unammisartut taava Thorshavn kisiat takussanngilaat, tassani marloriarluta unammissaagut Ingi Olsen naggasiivoq.
Unammisartut
- Isak Olsen
- Taatsiaq Villadsen
- Lars Ole Lyberth
- Lukas Aqqa Lings
- Miki Heilmann
- Nuka Heilmann
- Eqalunnguaq Kristiansen
- Milan Olsen
- Lars Møller
- Gustav O. Egede
- Karl F. Frederiksen
- Akutaaneq Kreutzmann Angutimmaril Kreutzmann
- Minik Dahl Høegh
- Aqqalu Ingemann
- Inujuuk Ostermann-Søholm
- Miki Duku Sørensen
- Ingi Olsen landstræner
- Rasmus Larsen sungiusaasup ikiortaa
- Berit Duus timimik sungiusaasoq