Assammik arsaannermi VM: Nunat nukittuut utaqqipput
Kalaallit Nunaat assammik arsaannermi nunarsuaq tamakkerlugu pissartanngorniunnermut peqataasussatut anngutissaguni, nunat nukittuut unammisussanngussavai.
Arlaleriarlutik nunarsuarmi pissartaasimasut Olympiske legenilu pissartaasarsimasut, Frankrig aamma nunarsuarmi pissartanngorniunnerni sølvinnattarsimasut Norge aamma Østrig.
Nunat taakku pingasut, amerika avannarlerni nunat caribiamillu pissartanngorniunneranni ajugaasut, assammik arsaalluni nunarsuaq tamakkerlugu pissartanngorniunnerni, Egyptenimi ingerlanneqartussaasumi, unammissavaat.
Kalaallit angut assammik arsaattartut unamminerni ingerlalluartariaqarput, nunat assammik arsaannermik pikkoriffeqartut unammisinnaajumagunikkit, assammik arsaannermik ilisimasaqarluartoq, Muusaarannguaq Ostermann-Søholm Sermitsiaq.AG-mut oqarpoq.
- Oqarsinnaavunga nunat taakku tamarmik assammik arsaannermik pikkorilluinnartuusut. Frankrig Norgelu pittaanerni inissisimapput. Østrig taakkunatulli pitsaatiginngilaq. Nunalli taakku tamarmik nunarsuaq tamakkerlugu assammik arsaattartuni pitsaanerni inissisimapput, oqarpoq.
Ataasinngorpat ataatsimiissapput
Muusaarannguaq Ostermann-Søholm oqarnera naapertorlugu Kalaallit Nunaat taakkununnga unammissaguni ingerlaqqinnissaa naatsorsuutigineqarsinnaanngilaq.
- Unammisussat ingerlalluarluinnassappata, unammeqataasut tamavimmik akiuukkumassuseqarlutik unammisariaqarput, unamminerni tamani. Unammereernerit kingorna iligiit imminnut qiviarsinnaasariaqarput nalunagu sapinngisartik tamakkerlugu unammisimallutik, Muusaarannguaq Ostermann-Søholm oqarpoq.
Nunarsuaq tamakkerlugu pissartanngorniuttoqarnissaanut Puerto Ricomi unammiuaartoqassanersoq, ataasinngornermi ataatsimiinnermi aalajangerneqassaaq.