Assammik arsaannermi unammisaqattaarnerit naammassingajalerput

Danmarkimi kalaallit angutit assammik arsaallutik unammisartut, tassa Akutaaneq Kreutzmannip, Minik Dahl Høeghio aamma Angutimmarik Kreutzmannip ukioq manna angusaat allaaserigaagut.

GOG-mut unamminermi Akutaaneq Kreutzmann.

Ukiuo ingerlanerani pisut assigiinngiiaarput. Ukiup unammiffiusup ingerlanerani Akutaaneq Kreutzmann angutini assammik arsaalluni unammisartuni pitsaanerniissimasuni kisiartaavoq. Minik Dahl Høegh aamma Angutimmarik Kreutzmann tamarmik immikkut klubbiminni unammisartut pitsaanerit tulliini, 1. divisionimi, unammisarsimapput.

Akutaaneq Kreutzmann

Akutaaneq Kreutzmann Nordsjælland Håndboldimi ukiuni unammiffinni marlunni unammeqataasareerluni naammassingajalerpoq. Unamminerit inaarutaasut unammeqataaffigereerunigit, allamik misiliisussanngussaaq.

- Danmarkimi ukiuni arlalinni unammisartuuneq toqqissisimanarpoq. Maannali misigisimavunga allamik misiliisariaqarlunga. Nunani allani unammisartutut misiliinissara qangali pilersaarutigaara. Suli aalajangiisoqanngilaq, suliarli ingerlappara. Neriuutigisattut ingerlassappat, sapaatit akunneri amerlanngitsut qaangiuppata aalajangertoqassaaq, Akutaaneq Kreutzmann oqaluttuarpoq.

Nunanut allanut unammisartut juunimi sungiusarlutik katersuunnissaat Akutaaneq Kreutzmannip qilanaaraa, sungiusarluni katersuunnermi Ilulissani Nuummilu ingerlanneqartussami Danmark U21-mut unammissapput.

Nordsjælland Håndboldip ukioq unammiffiusoq iluatsiffeqarlunilu iluatsinngiffeqarsimavoq. Akutaaneq Kreutzmannip unammeriaasia aamma taamaassimavoq. Unamminerit ilaanni ingerlalluartarpoq, soorlu pingasunngormat unamminermi pingaaruteqartumi, divisionimut appasinnermut inissinnissamut KIF Koldingimut unammigamik: Unammilluarneq arfineq-marlunnik isertitaqarluni arlaleriarlunilu kusanartunik isertitsissutaasunik tunniussisarluni.

Nordsjælland Håndboldip unamminerit tunngaviusut inissititernerni 11-ulluni naammassivai. Siorna unammisaqattaarnerni holdi unamminerit naggasiinerinut annguppoq.

- Neriuutigisatsituut ingerlasimanngilaq. Soorunami unamminerit naggasiinerinut, holdit arfineq-pingasut pitsaanerpaat ilaaffigisassaannut, peqataanissaq anguniarsimagaluarparput. Maanna kusanartumik angusaqarnissarput siunertaalerpoq, aappaagu Håndboldligartoqalerpat klubbi peqataasinnaaniassammat.

Minik Dahl Høegh

Minik Dahl Høegh Ajax København ukioq siulleq unammisartuuffigaa. Minik Dahl Høegh unammisartut allat peqatigalugit ukioq unammiffiusup aallartinnerani Københavnimi Vesterbromiittumi klubbimit ingerlalluartumit pisiarineqarpoq. Unamminermi pitsaanerit pingajuattut, Håndboldligamut ingerlaqqinnermik angusaqarfiusussatut, siunniussipput. Tamannali anguneqanngilaq.

- Holderput pisinnaagaluarpoq. Unammisartulli pikkorinnginnerusut unammineranni pointit qatanginnartoorpagut. Ajoqusertoqartaarpoq, holderpullu ajunngivikkaluartoq, angusaq naammagisimaanngilarput, Minik Dahl Høegh Sermitsiaq.AG-mut oqaluttuarpoq.

Minik Dahl Høegh bliver stoppet af tre Otterup spillere.

Ajax København normu 4 aamma 5 pointeqatigalugit normu 6-itut inissippoq. Klubbip sungiusaasuunermik suleqateqarunnaaneranut, inissititernermi inernerineqartoq pissutaasunut ilaavoq.

- Københavnimi unammeqataasarninni ukioq siulleq nammineerlunga nuannaarutigaara. Siuliani ukiuni unammiffiusuni arlalinni GOG-mi unammisareerpunga, aammalu Århus Håndboldimi Skanderborg Håndboldimilu unammisartuusimallunga. Håndboldligami ukiut unammiffiusut kingulliit marluk “ajoqusernerinnangajaapput”, Minik Dahl Høegh oqaluttuarpoq.

- Timera massakkut ajunnginneruvoq. Ukiunut arlalinnut sanilliullugu ukioq manna unammiffiusumi kiisami ajoqusinngiivippunga assammillu arsaannermik nuannarisaqartuunera misigeqqilerlugu. Soorunami holdimi målinik isertitaqarnerpaanera iluarisimaassavara 1. divisionimilu isertitaqarnerpaat sisamaattut inissisimagama.

Pilersaarutit iluatsissappata Ajax Københavnip ukioq unammiffiusoq tulleq aallartitsinnagu unammisartunik allanik pissarseqqereersimanissani naatsorsuutigaa. Ukiup unammiffiusup tulliani pitsaanerit pingasut akornanni inissinnissaq anguniagaaqqissaaq.

Minik Dahl Høgh aamma Akutaaneq Kreutzman naapissapput

Maajip 16-ani pokalinnanniunnermi kalaallit angutit nunanut allanut unammisartut Københavnimi Bavnehøj-Hallenimi imminnut unammissapput. Tassa klubbii Ajax København imaluunniit Nordsjælland Håndbold pokalinnanniunnernut anngunniullutik unammissagamik. Unamminermi pingaartinneqarluartumi Final4-imik taaneqartartumi holdit pitsaanerpaat sisamat naapittussaapput.

Angutimmarik Kreutzmann

Køge Håndboldimi ukiut unammiffiusut marluk ingerlareerput. Siorna ukioq unammiffiusoq naammassimmat Køgemi nuannattunnguarpoq. Klubbi 2. divisionimi unammilluareerluni 1. divisionimut, pitsaanernut qullarpoq. Klubbimulli Angutimmarik Kreutzmannimullu ajoraluartumik, klubbi 1. divisionimi naammaginartumik angusaqarsinnaasimanngilaq. Unamminerni 26-usuni ataasiarlutik ajugaapput ataasiarlutillu naligiillutik, taamaammat klubbi 2. divisionimut apparteqqinneqarluni.

- Soorunami nuannerneq ajorpoq unamminerni taama amerlatigisuni ajorsartaarneq. Unamminernili amerlanerpaani minutsini 40-ni 45-niluunniit peqataalluartarsimanigut tuppallersaataalaarput. Uannut pitsanngortarlunilu ajorsilaartarsimavoq. Unammisassagut uagutsinniit pitsaanerusarneri soorunami oqimaappoq, Angutimmarik Kreutzmann oqaluttuarpoq.

Angutimmarik Keutzmann IT-Supporterinngorniarluni ilinniarpoq 31-nillu ukioqarluni.

- Aalajangereerpunga sivikinnerpaamik ukiumi ataatsimi suli Danmarkimiissallunga. Assammik arsaanneq suli unitsinngilara, nunarsuaq tamakkerlugu aappaagu pissartanngorniuttoqarnissaanut anngunniunnernut peqataanissara tamaviaarnissaralu qilanaarilereerpakka. Manna klubbimik allamik unammisartutut atorfissannik ujaasivunga. Klubbi Københavnimi eqqaaniluunniit inissisimanissaa neriuutigaara.

Powered by Labrador CMS