Skip to main content

Assammik-arsaannermi pakatsineq: Unammisartut nunani allani misiliisariaqarput

Assammik arsaalluni nunanut allanut unammiartartuusimasoq, Ingo L. Bisgaard, angutit assammik arsaallutik nunanut allanut unammiartartuisa Savalimmiunut unamminerni marlunni ajorsarnerat pakatsissutigaa. Unammisartut nunani allani misiliisariaqarput, piginnaasallillu inerisartariaqarlutik, isumaqarpoq.

Kalaallit Nunaanni angutini assammik arsaalluni nunanut allanut unammiartartuusimasoq, Ingo L. Bisgaard, Savalimmiunut sapaatip akunnerata naanerani kingullermi unamminissamut qilanaarsimagaluarpoq.

Unamminernili marlunni kalaallit angutit nunanut allanut unammiartartui ajorsarujussuarput. Unamminermi siullermi isertitanik 15-inik kalaallit ajorsarput, unamminermi tullermi isertitanik qulinik ajorsarlutik.

- Unamminermi Kalaallit Nunaat taama takutinneqarnissaanik takorluuisimanngilanga. Allaanngilaq VM-imut anngunniunnermi anngutinngitsoorsimaneq Savalimmiunut nassaannarsimagipput. Kajumissuseq annikingaarmat unamminermi siullermi unillatsiartoqareermat, VM-imut unammisunik isiginnaaginnarpunga, Ingo L. Bisgaard Sermitsiaq.AG-mut oqarpoq.

Taanna oqarpoq 'illersuineq kajumeqatigiinnerlu aasap ingerlanerani annertusiartortinneqarsimasoq, sapaatip akunnerani naanermi ataatsimi Atlantikup Avannarpasissuani imaanut tinngunneqartoq'.

Unammisartut unammisarnermik misilittagaqalertariaqarput

Nunanut allanut unammisartunut iluaqutaangaatsiassaaq unammisartut arlallit nunani allani unamminermik misiliissappata, Ingo L. Bisgaard isumaqarpoq.

 - Siornatigut kalaallit nunanut allanut unammisartui nunani allani unammisarput, pingaartumik Danmarkimi ilaali aamma Tysklandimi Frankrigimilu, tamanna unammisartunut inerisaasarpoq nukittorsaasarlunilu.

Arkivfoto af Ingo L. Bisgaard (med bolden)
Leiff Josefsen

- Nunani allani namminermit pitsaanerit sungiusaqatigineqartarput, unamminermilu misilittagaqarnarnerulluni. Nunanut allanut unammisartuutigut ikittuinnaat unamminermik misilittagaqarput, tamanna aamma panamerikami pissartanngorniunnermi unamminermi malunniuppoq. Pan Am-imi Chilemut unammigatta unammeqataasut 16-iusuni aqqaneq-marluk GSS-issimeersuupput. Tamanna nunanut allanut unammisartunut ajornartorsiutaavoq, Ingo L. Bisgaard, assammik arsaalluni 2003-imi VM-imi unammeqataasimasoq oqarpoq.

GSS-issimiit pitsaanerusussaqanngilaq

Taanna isumaqarpoq nunanut allanut unammiartartut unammivallaartannginnerat ajornartorsiutaasoq.

- Unammillatuaraangamillu unammillerteqarpiaratik ajugaarujussuartarput, ukiuni arlalinni taamaattareerput. Taamaammat unammisartut unamminernik unammillerteqarnerusunut misilittagaqanngillat, unamminerup imminut ajunngitsumut saatinnissaanut misilittagaqaratik, taanna oqarpoq.

Ingo L. Bisgaardip oqarnera naapertorlugu GSS-issimut unammillertaasinnaasumik pilersitsinikkut tamanna qaangerniarneqarsinnaavoq, taamaasillutik unammisut nalingiinnerulernissaat anguniarneqarsinnaammat.

- GSS pikkoriffilinnut inerisaasutut ukiuni arlalinni siuttuusimavoq. NÛK-li angutini suliniuteqarpasilerpoq, GSS-issimullu unammillertaasinnaalerpasilluni – tamanna nunanut allanut unammisartunik nukittorsaatitut atorluarneqarsinnaavoq. Tusakkatta ilagaat N-48 Danmarkimi devisionimi unammisartumik unammisartuutitaarsimasut, taamaasillutik pitsaalluinnartunik unammisartoqalerlutik. Taakku saniatigut SAK Norsaq HC-lu pitsanngoriaqqissasut neriunnarpoq, erseqqissaavoq.

Anguniakkat annerusut ujartorpai

- Kalaallit nunanut allanut unammisartui siunissami VM-ertalernissamik sinnattugaqarunik, nunanut allanut unammisartuusut amerlineqartariaqartut isumaqarpunga. Panamerikami unammisartut arlallit Europamut aallartut takusarpagut, tasamanimi tappavanimi ineriartorluartoqarpoq. Islandimiut unammisartui aamma nunani allani unammisartunngorniartarput, takusinnaagamikku nunaminni unammiinnarneq naammanngitsoq.

- Island amerlanngikkaluartunik unammisartuuteqarluni tupaallannarpoq unammisartui qanoq pitsaatiginersut sungiusaasuilu qanoq pitsaatiginersut. Kalaallit Nunaat pikkorissunik arlalinnik unammisartoqarpoq, ineriartornerli unittoortarpoq najugarisami unammineq aallunneqaannartarami. Anguniakkagut annertunerusariaqarput, Ingo L. Bisgaard isumaqarpoq.

- Kalaallit Nunaat Danmarkimut taamaallaat qissimiinnartassava, imaluunniit Island suleqatiginiarneqarsinnaava, taamaasilluta unammisartugut Islandip unammisartuini unammeqataasarsinnaallutik taamatullu Islandimi sungiusaasut nunatsinnut sungiusaajartortissinnaallugit ilisimasanik takorluuinernillu avitseqatigiitsillugit?, aperivoq.

Pikkoriffinnik inerisaaneq

Assammik arsaannermi inerisaanissamut periarfissat arlallit Ingo L. Bisgaardip tikkuarpai.

- Siullermik tunngaviusumik unammisinnaasut amerlanerusariaqarput, nunanut allanut unammiartussat inerisarluarumallugit. Nunap iluani unammersuarnerni ukiuni arlalinni Kujataaniit aallartitaqartoqartanngilaq, soorlu assersuutigalugu Qaqortumiit K-1933. Klubbi taanna arlaleriarluni nunatsini pissartanngortarsimavoq, nunanullu allanut unammisartunik pitsaanerpaanik ineriartortitsisimalluni, soorlu Peter Sikemsen, Hans Peter Motzfeldt aamma Minik Dahl Høegh.

- Kissaatiginarsinnaavoq kattuffiup kujataani klubbit suleqatigilissagai, assammik arsaannerup aallartisaqqinnissaa anguniarlugu, erseqqissaavoq.

Sungiusaasut pitsaanerit

Ingo L. Bisgaardip nuannaarutigaa assammik arsaannermi kattuffiup pikkoriffillit sungiusarlugit ukiut marluk pingasut matuma siorna suliniuteqarmat.

- Suliniut ineriartornissamik siunertalik pitsaalluinnartorlu, tassuuna nunatsinniit nukappiaqqat niviarsiaqqallu Islandimut aallartinneqartarput unammiartortinneqarlutik. Suliniulli unissimarpasippoq.

Ingo L. Bisgaardip oqarnera malillugu ukioqatigiiaat pitsaalluinnartut akuttuallaarput.

- Kinguaariinni unammisartut Jakob aamma Rasmus Larsen, Hans Peter Motzfeldt, Peter Sikemsen kiisalu kinguaariinni unammisartut Minik Dahl Høegh, Akutaaneq aamma Angutimmarik Kreutzmann, ukiunik qulinik 15-inik nikingapput. Ukiuni qulini 15-iniluunniit kinguaariinni unammisartut pitsaasut utaqqeqqittariaqassanerigut annilaagangaara. Taamaammat kattuffiup meeqqat inuusuttullu, kiisalu pikkoriffinnik inerisaaneq ukkatarinerusariaqarpaat, nunanut allanut unammisartuni pitsaasut nikinganerat sivikilliniarlugu.

- Naggataatigut sungiusaasartut ilinniarfiannik eqqarsartoqartariaqarpoq, imaluunniit minnerpaamik sungiusaasut ataavartumik pikkorissarneqartariaqarput. Sungiusaasut pitsaaneruppata, unammisartut aamma pitsaanerussapput, Ingo L. Bisgaard oqarpoq.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER