Assammik arsaanneq: Arnat nunanut allanut unammisartut toqqarneqartut aajuku
Nunanut allanut unammisartunut sungiusaasut unammisartunik 22-nik toqqaapput, taakku ukioq manna nunarsuarmi pissartanngorniunnissamut anngunniuttoqarnernissaanut peqataasussatut eqqarsaatigineqarput.
Arnat assammik arsaallutik nunanut allanut unammisartui maajimi nunarsuarmi pissartanngorniunnernut anngunniunnissamut piareersarnerat aallartissimaleruttorpoq. Unammisartut sungiusaasui Johannes Groth aamma Anders Friis maanna unammisartunik 22-nik toqqaagallarsimapput.
Nunanut allanut unammisartut kingullermik novembarimi Nuummi katersuunneranni toqqarneqartut 24-t peqataapput aamma inuusuttut piukkunnaatillit qaaqqusat peqataallutik.
Inuusuttut malunnaateqartut
- Katersuunnitsinni arnat 30-t missaanniittut sungiusarpagut. Taamaalilluta unammisartut takutitsilluarsimasut toqqarneqarallartunullu ilaanngikkallartut qanoq inissisimanerat takusinnaaniassagatsigu. Pingaarnermik inuusuttut qaaqquneqartut malunnaateqarput, nunanut allanut unammisartut sungiusaasuat Johannes Groth oqaluttuarpoq.
- Unammisartut siammasimmata aamma unammilleqatigiinneq malunnarpoq, taamaalillutalu maanna toqqarneqarallartut kingulliit nalilersorluarsinnaasimavagut, sungiusaasoq oqarpoq.
Katersuunnerup tullia
Nunarsuarmi pissartanngorniulluni maajimi unammisussat 16-it toqqarneqannginnerini, naanna unammisartunit 22-iusunit 18-inut marsip naanerani Ikastimi sapaatip-akunneranik sivisussusilimmik sungiusarluni katersuutsitsisoqarnissaa pilersaarusiorneqartoq ilisimatitsissutigineqarpoq.
Nunarsuarmi pissartanngorniulluni unamminerit sumi pinissaat Timersoqatigiiffiit Assammik Arsartartut Kattuffiata IHF-mit paasisaqarnissani utaqqivaa, kisianni qanittukkut inissinneqarnissaa naatsorsuutigineqarpoq.
Arnanut nunanut allanut unammisartut uku toqqarneqarallarput:
1. Aviaaja Heilmann, GSS
2. Nivi Fly, GSS
3. Andrea Andreassen, GSS
4. Nuunu M. Lukassen, NÛK
5. Ulla Kleist, GSS
6. Lykke Frank Hansen, GSS
7. Sara Biilmann Egede, VHC Vidar
8. Clara Nielsen, Skovbakken/Århus
9. Panu P. Grønvold, GSS
10. Ivaana Holm, GSS
11. Ivalu Bjerge, Team Tvis Holstebro
12. Kathrine F. Mikkelsen, Silkeborg-Voel KFUM
13. Mia Egede Rasmussen, Lyngby HK
14. Najaaja A. Lyberth, GSS
15. Christina V. Lange, NÛK
16. Nivi Berthelsen, GSS
17. Ivaana Meincke, GSS
18. Aviana Kajangmat, NÛK
19. Pilunnguaq Rosing Wille, NÛK
20. Nivi J. Petersen, GSS
21. Sandra Rothberg, Silkeborg-Voel KFUM
22. Anja Heilmann, GSS