Assammik arsaalluni pissartanngorniunneq: Pingasunngornermi unamminissat inissiissammata pissanngatigineqartut
Angutini assammik arsaattartut NÛK-meersut GSS-imut marlunngornermi unamminerat pissanganarluinnarsimavoq, NÛK-lu målimik ataatsimik siuarluni ajugaalluni. Unamminerilli ullumi allatut kinguneqartitseriaannaapput.
Illoqarfeqatigiit, ukiuni arlalinni unammiuartuusut, NÛK aamma GSS Inussivimmi marlunngornermi unammimmata pissanganarluinnarput. Assammik arsaannermi pissartanngorniunnermi siullermik unammigamik, naggatissaa tikillugu isiginnaartunut pissangatitsilaavipput.
- Pissartanngorniuttoqarnerani ippassaq tupaallannartoqarpoq. Angutini NÛK aamma GSS unammipput. GSS naluneqanngitsutut pissartaajuartarsimavoq, NÛK-li ippassaq ajugaavoq. Unammineq pissartanngorniunnertut unamminermik taaneqarluarsinnaasoq, Timersoqatigiit Assammik Arsaattartut Kattuffianni, TAAK-imi siulittaasoq, Carsten Olsen Sermitsiaq.AG-mut oqarpoq.
Unamminermi immikkoortoq siulleq naammassimmat nunatsinni pissartaasartut GSS siuaqqapput, isertitat 10-11-tut nalunaarsorsimallutik. Unamminerup immikkoortuisa aappaanni GSS siualertorpoq, målinillu arlalinnik siuaraluarluni. NÛK-lli ilungersornera imminut akilerluarpoq, unamminermi naammassimmat NÛK 23-22-mik siuaqqalluni ajugaavoq.
- Tamanna isumaqarpoq angutini pissartanngorniunnerni ullumi unamminissat pissartanngorniutivinnerup qanoq inissinnissaanut pingaaruteqarluinnalersut, Carsten Olsen nassuiaavoq.
Suli aalajangiisoqanngilaq
Angutit assammik arsaattartut NÛK Ilulissaneersut N-48 pingasunngornermi unammissavaat. Tassani angusat pissartanngorniutivinnissamut anngunniuffissanut inissiisussaapput, siulittaasoq ilisimatitsivoq.
- NÛK ajugaassaguni semifinalemi unammilluarnissaminut isumannaassaaq. N-48-li ajugaassaguni semifinaleni unammisussat isertitaqqortussusaat aallaavigalugit inissinneqartussanngussapput, Carsten Olsen nassuiaavoq.
Arnani GSS ukioq manna aamma siuttuuvoq.
- Arnani GSS siuarsimalluinnarpoq, maannakkutullu iinnassappat nunatsinni pissartanngoqqinnissaat qularnarunnaariartorluni. Unamminerni kikkut sølvinnassanersut soorunami suli pissanganarpoq, aammalu kikkut bronzennassanersut, Carsten Olsen oqaluttuarpoq.
K-33 Qaqortumeersoq, NÛK Nuummeersoq aamma akuleriillutik iligiit medaljennannissamut suli periarfissaqarput.
Pissartanngorniunnermi unammisut piginnaaneqarluartut
Qaqortumiit K-33 arnani angutinilu assammik arsaalluni pissartanngorniunnernut ukiuni arlalinni ilaasimanani kiisami peqataatitaqarpoq. TAAK-imi siulittaasup immikkut nuannaarutigaa K-33-p peqataaqqilernera.
- Unamminernilu aamma takutitsilluaqaat. Pissartanngorniunnerni peqataaqqilernerat nuannerpoq, peqataasarsimanngikkaluarlutilli maanna takutitsilluaqaat, oqarpoq.
Carsten Olsenip oqaluttuaraa Inussivimmi isiginnaartut qiimmassaalluartartut maluginiarsimallugu. Unammisartullu unammereernerup kingorna aamma ikinngutigiissinnaanerat nersualaarlugu.
- Unammisut tamarmik piginnaasamikkut qaffasissorujussuarmik inissisimapput. Assut sukataarput, timersuummullu tunniusimalluinnarlutik. Unamminerit pissanganarlutillu sakkortusaraluartut, taamaattoq unammereernerup kingorna ikinngutigiilluartarput. Timersornerup anersaavanik pitsaasumik atuipput, oqarpoq.
NÛK ukioq manna pissartanngorniunnernut aaqqissuisuuvoq. Pingasunngornermi unamminissat, semifinalet pissartanngorniutivinnerillu piffissai uani ataani takusinnaavatit:
Formatering Kilde