Assammik arsaalluni nunanut allanut unammiartartoq ilinniartitsisunngulersorlu

Aqqalu Sandgreen assammik arsaannerup iluani ilisimaneqarnerulerfia tassaavoq Nuummi juunimi 2018-imi Panamerikami pissartanngorniuuttoqarmat. Soqutigineqarlualipallappoq, amerikammi kujataanit nunat unammisartut pitsaalluinnartut unamminerini isertitaqarluartarpoq.

Nunarsuarmi pissartanngorniunnissanut Kalaallit Nunaat peqataasussatut inissingajalluinnarpoq. Chilemut unammeqqinneq pissanganarluinnarsimavoq, Kalaallit Nunaalli ajorsaqqalaarpoq, Chilelu pitsaanerit pingajuattut inissilluni. Unammiartut pitsaanerit pingasut, Chile, Brasilien aamma Argentina nunarsuarmi pissartanngorniunnissanut anngupput.

Panamerikamiut pissartanngorniunneranni Aqqalu Sandgreen nittartakkakkut attaveqatigiittarfinni ullormut 200-nit kammagiumaneqarluni attavigineqartarpoq.

Aasianni aallartippoq

24-nik ukiulik Aqqalu Sandgreen Aasianni inunngorpoq. Meeraanermini Ilulissani Nuummilu aamma najugaqarsimavoq. Aasianni GU-simavoq. Assammillu arsaannermik aallarteqqaarami Norsaq HC-miilluni.

Himmelbjergets Efterskolemi atuarsimavoq, Silkeborgimilu håndbold collegemi atuarsimalluni, taamaasilluni danskit niuernermik ilinniarfianni HG-mi naammassinnissimalluni.

Danmarkimi najugaqarnermini Silkeborg-Voel KFUM tunuliaqutaralugu unammisarsimavoq. Maanna Ilinniarfissuarmi ilinniarpoq, assammillu arsaanneq suli ingerlallugu.

- Ilinniartitsisutut ilinniarnera upernaakkut 2021-mi naammassissagunarpara. Fysik aamma kemi ilinniarfigaakka, kalaallisullu pingaarnertut ingerlallugu, Aqqalu Sandgreen sungiusarnermit unikkallarnerup nalaani oqaluttuarpoq.

Aqqalu Sandgreen iluarisimaarinnilluarpoq. Inuuneq ajunngilluinnartoq isertuussinnaanngilaa.

- Inuunera ajunngilluinnarpoq. Ikinnguterpassuaqarpunga ilaqutarissaarlungalu.

Aqqalu Sandgreen ilaqutariinni ilinniartitsisunngortussani siulliunngilaq. Aataava ilinniartitsisuusimavoq.

Assigiinngingaatsiarput

Aqqalu Sandgreenip ilisimaarilluarpaa Nuummi assammik arsaanneq Odensemilu sungiusarluni unamminerit assigiinngingaatsiartut.

- Teknikkikkut qasujaannerullu tungaatigut ilaasinnaalluarpagut. Timilli pisinnaasaannut malinnaaniapiloorpugut. Unamminerit assigiinngingaatsiarput. Danmarkimi klubbit unammiffiup nalaani unammiinnavittarput imminnullu sukataartissinnaallutik. Nuummi nalunngisagut unammisarpagut, unamminerillu ikippallaarlutik. Piffissap ilaani timersornermut soqutiginninnerup naammattuunissaa unammillernalaartarpoq, unamminerit amerlanerunngikkaangata.

- Ullut tamaasa sungiusartarpunga. Sapaatip akunneranut pingasoriarlunga assammik arsaattarpunga, timigissartarlungalu.

Ataatsimoorneq naggataajugallartoq

- Egyptenimi 2021-imi nunarsuaq tamakkerlugu pissartanngorniuttoqarnissaanut anngunniunnissamut peqataassagatta Mexico Citymut apriilimi angalassaagut. Unammialinnginnitsinni ataasiarluta marloriarlutaluunniit naapeqqissinnaagutta pitsaassagaluarpoq, unammeqatigiinnerit pitsaanerulersinniarlugit.

- Soorunami sapinngisarput tamaat unammeqatigiissaagut, aamma nuannaarpugut Odensemi naapeqatigiissinnaangatta. Sungiusarluta maannamullu marloriarluta unammisaqareerluta, Aqqalu Sandgreen naggasiivoq.

Maannamut ajorsarnerit marluk

Nunanut allanut unammiartartut SUS Nyborgimut tallimanngornermi unnukkut unammigamik 31-27-mik ajorsarput. Otterup Håndboldklubbimut arfininngornermi ullaap tungaani unammigamik 35-24-mik ajorsarlutik.

Unamminerup inerneri soqutigineqarujussuartariaqanngillat. Misileraanerpassuit misilinneqarput unammisartullu tamarmik misiliitinneqarlutik. Unammisartullu pingaarnerit arlallit ajoqusersimapput.

Unammineq kingulleq ataasinngornermi

Nunanut allanut unammiartartut sungiusariarlutik unammiarnerminni Odense Idrætsholdimi ataasinngornermi unnukkut naggataasumik unammissapput.

Unammisassaat tassaavoq HC Odense. Unammineq aallartissaaq 18.30.