Assakaasut quaannaveeqqutillit immikkut akuerineqarlutik suli ukunani atorneqarsinnaapput
Sumiiffinni arlaqartuni sila suli nillerpoq, taamaattumillu assakaasut quaannaveeqqutitaqanngitsut atulernissaanut suli navianarpallaarluni. Maanna immikkut akuerisaanermi assakaasut quaannaveeqqutillit maajip 15-iat ilanngullugu atorneqarsinnaapput.
Assakaasut quaannaveeqqutillit sumiiffinni assigiinngitsuni maajip aallaqqaataani peerneqassanngillat, silami suli issippallaarpoq. Inatsit malillugu maajip aallaqqaataani assakaasut quaannaveeqqutillit assakaasunut quaannaveeqqutitaqanngitsunut taarserneqartussaagaluarput, politiit tusagassiuutinut nalunaarummi allapput.
Taamaammat Avannaata Kommuniani, Qeqertalik Kommuniani aamma Qeqqata Kommuniani assakkaasut quaannaveeqqutillit maajip 15-iat ilanngullugu politiit immikkut akuersineranni atorneqarsinnaapput. Taassumallu saniatigut Nuummi, Nuussuarmi Qinngorpumilu immikkut akuersissummik tunniussisoqarpoq, tassa sumiiffinni taakkunani aamma maajip 15-iat 2022 ilanngullugu assakaasut quaannaveeqqutitallit atorneqarsinnaapput.
Kommunilli allat inatsit malissavaat.
- Kommunini sinneruttuni assakaasut quaannaveeqqutillit maajip aallaqqaataani taarserneqassapput. Politiit tusagassiuutinut nalunaarummi taama nalunaarput.