Aslak W. Jensenip Inatsisartunit tunuarniarluni qinnuteqaatini ullaaq manna Inatsisartut Siulittaasoqarfianut tunniussimavaa.

Ullumikkut ukiakkut ataatsimiinnerup ammaanersiorneqarnerani Inatsisartut Siulittaasoqarfianit tamanna ilisimatitsissutigineqarpoq.

Aslak Jensenip tunuarniuteqarnerminut inuttut atukkani pissutaasut, taanna tusagassiorfitsigut nalunaaruteqarluni allappoqt. 

- Inuttut aqqusaarsimasakka pissutigalugit taamak aalajangersimavunga. Aalajangerneq taanna uannut soorunami imaannaanngilaq. Tamanna isumaqanngilaq politikki qimakkiga, kisianni tassa qinikkatut sulinera unitsikkallassallugu aalajangersimavunga, tamannalu ataqqillugu paasineqassasoq kisaatigaara, Aslak W. Jensen oqarpoq.

Aslak Jensen Kommuneqarfik Sermsuup isumaginnittoqarfiani sulisumut qunusaarisimasutut januaarimi eqqartuussaavoq. Dommerip pinerluuteqaqqippat ulluni 20-ni pinerluuteqarsimasut inissiisarfianiittussatut taamanikkut eqqartuussimavaa. Aslak Jensenip eqqartuussut Nunatta Eqqartuussivianut suliareqqitassanngortissimavaa, 2022-mi novembarip qaammataani suliareqqitassanngortitaq suliarineqartussaavoq.

Erik Jensen træder til

Siumumi siulittaasup Erik Jensenip Aslak Jensenip taamatut aalajangersimanera uggoraa, aalajangersimanerali ataqqillugu.

- Inuk politikimik suliaqarnissamut piukkunnarluartoq qinikkatut sulinerminit tunuarternera
uggornarpoq. Siumumili Aslak W. Jensenip kissaateqarnera ataqqillugu tunuarniuteqarnera
tusaatissatut tiguarput, annerusumillu oqaaseqarfigissanatigu, Erik Jensen oqarpoq..

Siumup Inatsisartunut ilaasortaatitanut allannguisoqartariaqalerneranut tunngatillugu, Erik Jensen Inatsisartunit sulinngiffeqarallarsimanerminit atorunnaarsitsigallarniarluni
 Inatsisartut Siulittaasoqarfianut qinnuteqarpoq.