ASK-imi atuartut: Ilikkagaqarnerusalerpugut

Coronartoqareernerata kingorna atuariartoqqinneq pillugu Nuummi Atuarfik Samuel Kleinschmidtimi atuartut apeqqutinik akisaqarput

Naak coronavirusi nappaataagaluartoq ulorianartoq, nunarsuarmi inuppassuit napparsimassutigileraluaraat, pitsaasumik kinguneqartitsivoq. Atuartitsinerummi tungaatigut pitsaasumik sunniuteqarpoq.

Atuarfinni atuaqatigiiaat ikinnerulerput, atuartitsinerit sivikinnerulerput, aaqqiagiinnginnerit ikinnerulerput, eqqissisimasoqarnerulerlunilu ataqatigiittoqarnerulerpoq. Atuariartoqqilluni qanoq innersoq aamma siunissami atuarfik atuartunit qanoq isikkoqartikkusunneqarnersoq pillugu Atuarfik Samuel Kleinschmidtimi atuartut aperineqaramik akissutaat uani atuarsinnaavatit:

Lea Juhl, 4.A hold 1:

- Atuarfimmi atualeqqilluni ajunngilaq, ikinngutikka kiisami takoqqittalerpakka. Angerlarsimaffimmi atuartinneqarneq pikkunaassinnaavoq. Maanna atuarfimmi atuarneq eqqissisimanarneruvoq, suliassagut suliarilluarsinnaalerpagut, aamma ilinniartitsisutta piffissaqarfiginerulerpaatigut, eqqissisaasaqattaarunnaarlutillu. Angerlaraangama qasoqqavallaartarunnaarpunga, aamma niaqorluttarnikka annikillinikuupput. Siunissami atuarfipput ima isikkoqassasoq neriuutigaara.

Tanja Hansen, 5.B, hold 1:

- Atuariartoqqilluni eqqumiilaarpoq kisianni nuanneqaaq. Ikinngutikka maqaasinikuuakka. Maanna ilikkagaqarnerusalerpunga immaqa atuartut ikinnerunerat pissutaalluni. Eqqissisimanerusumik atuartinneqartalernikuuvugut, taamaattumik ajornannginnerusumik ilikkagaqartalernikuuvugut. Aamma ilinniartitsisutta ikiornerusalernikuuaatigut. Kisianni atuaqatigiit tamakkeqqinnissarput qilanaaraara, ikinngutikka marluk holdip aappaaniikkamik atuaqatigileqqinnissaat qilanaaraara.

Stian Jensen, 4.A:

- Nuannerpoq uteqqilluni ilikkagassaqaqqilerlunilu. Silami aamma atuartinneqartarnerput nuannaraara. Klassimi ikilinikuunerpoq iluareqaara, ilinniartitsisummi piffissaqarfiginerulerpaatigut aamma eqqissisimanerulernikuupput. Siunissami atuaqatigiiaat ikilineqassasut neriuutigaara, taamatut nuannarineruara. Aamma qinngasaarisoqartarunnaarpoq.

Ivaana Wille, 4.A, hold 2:

- Atuarfimmut uteqqilluni nuanneqaaq. Angerlarsimalluni atuartinneqarneq pikkunaagaara. Atuaqatigiit ikilinerput iluaraara, tassami nipiliortoqartarunnaarpoq. Atualeqqikkatta ilikkagaqarnerulernikuuvunga, aamma soraajaartarnerput iluaraara, taannartaa kisianni aamma eqqumiilaarpoq. Maannamut atuartinneqarnerput siunissami taamaaginnassasoq neriuutigaara.

Powered by Labrador CMS