mellembølge nassitsissutit
Asimi radio tusarnaaruk
Sumiiffinni pingasuni, tassalu Qeqertarsuarmi, Kitsissuni Nuup eqqaaniittuni aammalu Simiuttami nunatta kujataaniittumi, maanna mellembølge atuutilerpoq, tusarnaartullu KNR mellembølgekkut tusarnaarsinnaaleqqippaat, Tele-Post ilisimatitsivoq
Sinerissami angallatinik angalasunut imaluunniit inunnut inoqarfiunngitsunukartussanut nutaarsiassatsialak. Tassami KNR-radio maanna mellembølgikkut tusarnaarneqarsinnaaleqqippoq, Tele-Post tusagassiuutinut nalunaaruteqarpoq.
- Tele-Postimi teknikerit mellembølgimut atortortaat sungiusarsimalermatigit, siunissamilu ukiorpassuarni tulliuttuni, Tele-Postip mellembølgikkut aallakaatitsineq ingerlassinnaalerpaa, Tele-Post allapoq.
Mellembølgikkut aallakaatitsisoqaleqqissinnaanera Tele-Postip taamaalilluni naammassivaa, tamannalu Namminersorlutik Oqartussallu ’KNR-i asimi’ pillugu isumaqatigiissummi 2014-imeersumi isumaqatigiissutigineqartoq, piffissaliussap aningaasaliissutillu iluanni naammassineqarluni.
KNR mellembølgikkut ugguuna tusaaneqarsinnaavoq:
- Qeqertarsuaq 650 KHz
- Kitsissut Nuup eqqaani 570 KHz
- Simiutaq nunatta kujataani 720 KHz