Asiip politikkerinngoqqissinnaanini mattutinngilaa
Politikkerit nuimasut politikkikkut tunuaraangamik nalinginnaasumik tusarsaajunnaartarput. Asiili allatut perusuppoq: - Kikkut tamarmik maannakkorpiaq oqaluuserisaat oqaatigaara, Asii nassuiaavoq.
Politikkeritut nuannarineqarnerpaat ilaat Asii Chemnitz Narup (IA) juunip qaammataani bormesteritut tunuaramili – inuiaqatigiit maanna oqallinnerannut – siullermeerluni politikkikkut akuliuppoq.
AG illoqarfiit pingaarnersaata kommuniani borgmesteriusimasumik apersuisimasoq allappoq.
Tamanna pivoq Naalakkersuisut Siulittaasuat Kim Kielsen naalakkersuisunut iliuuseqarsinnaanngitsunut siuttuunerarlugu isornartorsiuimmat.
- Naalakkersuisut taarserneqarnissaat pisariaqarluinnarpoq. Piffissaq asiutiinnarunnaartariaqarparput, atuartartutut allakkamini, Sermitsiakkut kingullermik saqqummiunneqartumi allappoq.
Asii Chemnitz Narupip qinersisoqarnissaanik kaammattuinera nuna tamakkerlugu politikkeritut suliaqaqqerusulersimanersoq eqqarsalersitsivoq. Najukkami politikkeritut Nuummilu »aqutsisutut« ingerlatsilinnginnermini 2003-miit 2006-ip tungaanut naalakkersuisuusimavoq.
- Qinersisoqassappat qinigassanngortissallutit eqqarsaatigaajuk?
- Taamaalluarsinnaavoq. Maannakkorpiaq aappiullunilu naamiuvoq. Qaqugu qinersisoqassanersoq apeqqutaavoq. Taamanikkussamut isummerumaarpunga, Asii akivoq.
Asiip apersorneqarnera tamakkerlugu AG-mi atuaruk – linki una aqqutigalugu iserfigisinnaavat :