Skip to main content

Asiip mittarfik kusanaatsoq pinaveersaartinniarpaa

Kommuneqarfik Sermersuup ASN-imik nalunaarusiaq tusarniaassutigineqaqqammertoq sakkortuumik isornartorsiorpaa. ”Suliniummi mittarfiup illoqarfiit pingaarnersaanni qeqqanut inissinneqarnissaa isiginiarneqanngilaq”, borgmester oqarpoq arlalinnillu piumasaqarluni.

Mittarfittaassap isikkuata illoqarfimmut pitsaanngitsumik ilisarnaataalernissaa, borgmester Asii Chemnitz Narupip ernummatingaa. 

- Ilisarnaatissatut qullilersuinissamik qaqqalluunniit qaavani kusassaanissamik kommuni siunnersuuteqarsimavoq, borgmesteri tusarniaanermut akissuteqaammi paasissutissiivoq pakatseqqallunilu naliliilluni:

Ilisarnaat pitsaanngitsoq

- Suliniutip takusassiartaani ersarissumik takutinneqarpoq, sanaartukkap uuma Nuummut pitsaanngitsumik ilisarnaasiisinnaanera.

Borgmester sapaatip akunneri arlaqanngitsut matuma siorna mittarfiit pillugit oqallinnermi Inatsisartuni amerlanerussuteqartunit tapersiisoqarnera nuannaarutiginnissimasoq, ullumikkut isornartorsiuivoq.

- Isikkussaanut atatillugu anguniagaqanngippallaaqaaq, borgmester erseqqissaavoq.

Quassussuaq

Taassuma ilanngullugu ernummatigaa, mittarfissap nunagissarnissaanut Quassussuarmik annertuumik qaartitserisoqarnerata kingorna qanoq annertutigisoq sinnerutissanersoq.

- Tassani kommunip aamma kissaatigivaa, ineriartornermi pinngortitamik aserorteriinnarani nunagissaalluni naammassineqassasoq, ersarissumik oqaatigineqarpoq.

Isikkulersuinissaq pillugu Asii Chemnitz Narupip paasisinnaanngilaa masterit angisuupilussuit (60-80 meterinik portussusillik aaqq.) sanaartortussamit isikkulersorneqarniarnerat.

Masterit ilusilersorneqassapput

- Ilusilersuinerup qanoq pingaaruteqartiginera eqqarsaatigineqartariaqarpoq, assersuutigalugulu aalajangiisartunit akuerineqartariaqarluni, borgmester masterinik nappaaneq Kalaallit Nunaanni illoqarfiini sanaartornermi portunerpaasussat pillugit isummerpoq.

- Mittarfik masterillu ersarillutik Nuussuup Qinngorpullu akornanniissapput. Sanaartukkat taakkua ullut tamaasa innuttaasunit sanioqqunneqartassapput, borgmester tusarniaanermut akissuteqaammi Avatangiisimut Naalakkersuisoqarfimmut nassiunneqarsimasumi allappoq.

Taassuma neriuutigaa, ”avatangiiseq, inuit kiisalu sanaartungaq masterillu eqqarsaatigalugit Kalaallit Airports aamma Naalakkersuisut anguniagaqarluarumaartut”.

Amigaatilik

- Maannakkut suliniut annertuumik amigaateqarpoq, mittarfissallu Nuummut pitsaanngitsumik ilisarnaasiisinnaanera aarlerinaateqarluni, borgmester erseqqissaavoq.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER