Asiip akileraarutitigut ilanngaatit atuuttut atuutsiinnarniarpai
Naalakkersuisut akileraartarnermik annertuumik aaqqissuusseqqinniaraluartut, 2022-mi akileraarutitigut ilanngaatinut sunniuteqassanngilaq, Asii Chemnitz Narupip saqqummiussissutaani tamanna atuarneqarsinnaavoq
Akileraarutitigut ilanngaatit maanna atuuttut aappaagu aamma atuutsiinnarneqarnissat pillugu naalakkersuisooqatigiilersut nutaat inassuteqaataat politikkerit maajip pingajuani arfineq-aappanilu immikkut ittumik ataatsimiinnerminni akuersissutigissavaat.
Aningaasaqarnermut Naalakkersuisup Asii Chemnitz Narupip saqummiussissummini, Inatsisartut nittartagaatigut tamanut saqqummiunneqareersumi nassuiaatigaa, akileraartarnermik aaqqissuusseqqittoqarniaraluartoq inummut ilanngaatit ilanngaatillug aalajangersimasut sooq allanngortinneqarnianngitsut.
Inuuniarnikkut atugarissaarnerulertoqassasoq
- Naalakkersuisut akileraartarnermut suliassaqarfimmi inuuniarnikkut atugarissaarnerulernissamut ilapittuutaasumik aaqqissuusseqqinnissaq sulissutigissavaat. Tamanna Naalakkersuisut politikikkut aalajangermi ataqatigiissitsinissamut anguniagaannut atatillugu ingerlanneqartariaqarpoq, taamaattumillu aaqqissuusseqqinneq taamaattoq kisimi ingerlanneqarsinnaanani. Taamaalilluni tamanna piviusunngortinneqassappat ilaatigut isumaginninnermut suliassaqarfimmi ineqarnermut suliassaqarfimmi allanilu suliniutinut aggersunut ataqatigiissaarneqartariaqassaaq, Asii Chemnitz Narup allappoq, nangillunilu ilanngullugu:
- Suliassami annertuumi tassani politikikkut oqallinnissamut piffissaq pisariaqartoq atorneqassaaq, soorluttaaq atugarititanik aamma naligiinnerulernissamik anguniakkat piviusunngortinniarlugit aaqqissuusseqqinnermi suliamut isumalluutit pisariaqartut immikkoortinneqarnissaat qulakkeerneqassasut.
Sioqqutsisumik tikitaqarnianngitsut
- Taamaammat akileraartarnermut immikkoortumik aaqqissusseqqinnermut politikikkut oqallinnerit suliniutillu ilaatinneqartussat sioqqutsisumik tikikkumanagit, 2022-mullu 2 akileraarutitigut ilanngaatit il.il. ukiup affaani siullermi ataatsimiinnermi akuersissutigineqartussaanerat eqqarsaatigalugu, 2022-mi akileraarutitigut ilanngaatissat il.il. 2021-mut sanilliullugit allannguuteqassanngitsut Naalakkersuisut siunnersuutigaat, saqqummiussissumi nassuiaatigineqarpoq.
Taamaalilluni 2022-mi ilanngaatit imatut annertussuseqassapput:
- Inummut ilanngaat: 48.000 kr
- Ilanngaat aalajangersimasoq: 10.000 kr.
- Aningaasarsiat B-t akileraaruteqaataasussaanngitsut: 5.000 kr.
- Killilimmik akileraartussaatitaasut ilanngaataat: 1.000 kr.
- Kommuninut ataatsimut akileraarut: 6 procent