Asii: Nipilersortartut annikinnerusumik akileraartinneqassanngillat
Nipilersortartut akileraartarnikkut oqilisaaffigineqarnissaannik Naalakkersuisut pilersaaruteqanngillaq, Aningaasaqarnermut naalakkersuisoq Atassutip siulittaasuanut ilisimatitsivoq.
Atassutip siulittaasua Aqqalu C. Jerimiassen Naalakkersuisunut arlalinnik apeqquteqarsimavoq, isumaqarami nipilersortartut atugaasa pitsanngorsaaffigineqarnissaat piffissanngortoq.
Partimi siulittaasup ilaatigut paaserusussimavaa, eqqumiitsuliornermik suliaqartartut akileraartarnikkut oqilisaaffigineqarnissaannik Naalakkersuisut pilersaaruteqarnersut, Aqqalu C. Jerimiassenilu apeqquteqaamminut tunngavilersuuteqarluni imatut allappoq:
- Ukiorpaalunngorput nipilersortartut atugaannik pitsanngorsaarusulluta oqalulluta. Massakkullu killiffigisariaqalerparput inatsisitigut qanorpiaq teknikkitaatigullu allannguinissamut iliuuseqarnissaq.
Kan blive en skjult støtte
Aningaasaqarnermulli naalakkersuisoq naapertorlugut tamanna pisinnaanngilaq:
- Eqqumiitsuliornermik suliaqarnermik immikkut sammisumik akileraartarnikkut oqilisaassisoqarnissaanik Naalakkersuisut pilersaaruteqanngillat, Naalakkersuisut isumaqarmata kikkut tamarmik isertitaminnik naligiissumik akileraartussaasut, apeqqutaatinnagu eqqumiitsuliortutut, aalisartutut imaluunniit eqqiaasutut inuussutissarsiorneq, Aningaasaqarnermut Naalakkersuisoq Asii Chemnitz Narup (IA) akissuteqaammini allappoq.
Itigartitsissuteqarnermini tunngavilersuutigaa, akileraarutitigut oqilisaassilluni eqqumiitsuliortunut tapiissuteqartarneq, taamatut tapiissuteqartarnermi aningaasartuutiviit politikkikkut aalajangiisartunut ersikkunnaarsinneqassasut.
Toqqaannartumik tapiissutigisartakkat aqqutigineqartariaqartut
Eqqumiitsuliortunut ikiorsiissuteqartarneq akileraartarnikkut aaqqissuussineq aqqutigalugu ingerlanneqartariaqanngikkaluarpoq, kisiannili aningaasanut inatsimmi tapiissutitut aningaasaliissutit aqqutigalugit ingerlanneqartariaqarluni, tamannalumi ullumikkut taamatut pisarpoq, naalakkersuisoq oqarpoq:
- Tamanna ilaatigut pisarpoq tapiissuteqartarnikkut aningaasaliissuteqartarnikkullu kiisalu kulturikkut aaqqissuussinernut assigisaannullu tapiissuteqartarnikkut. Ukiuni tulliuttuni tamakkiisumik isigisumik kulturikkut politikkimik Inatsisartut susassaqartullu suleqatigalugit suliaqarnissamut Naalakkersuisut qilanaarput, Asii Chemnitz Narup Aqqalu C. Jerimiassenimut akissuteqarluni allappoq.