Asii: Kommuni atornerluisuunngilaq
Borgmesterip Asii Chemnitz Narupip piviusulersaarut 'Byen hvor børn forsvinder' pillugu maanna oqaaseqarpoq - Facebookimi
Piviusulersaarut 'Byen hvor børn forsvinder' pillugu borgmesteri Asii Chemnitz Narup (IA) aallaqqaammut nipangersimasinnarluni maanna oqaaseqarfigaa.
Kommuneqarfik Sermersuumi attaveqaqatigiinnermut immikkoortoqarfimmi sulinngiffeqarnera taamaattumillu attaveqarfigineqarsinnaannginnera ataasinngormalli nalunaarutigineqaqattaaraluarpoq.
Piviusulersaarummut atatillugu Asii Chemnitz Narup (IA) DR-imi marsimi immiunneqartumut ataatsimut peqataanikuuvoq.
Aallakaatitassiami ilinniartitsisup Rikke Blegvadip ataatsimeeqatiginissaanit tunuarpoq, taanna isumaqatigiissutaareersimagaluarpoq. Borgmesterip taamatut qisuariaateqarnera ilaatigut borgmesterimut inuit attaveqaqatigiittarfiini isornartorsiuisoqarneranik kinguneqarpoq.
Suliniuterpassuit
Isornartorsiuineq Asii Chemnitz Narupip ippassaq unnukkut sulinngiffeqarnernerminik takinerusumik Facebookimi allagaqarnissamut piffissaqarluni taamaatititsivoq.
- Isornartorsiutit uannut tutsinneqartut akuerinagit imaluunniit ilisarinagit nassuerutigisariaqarpara, taanna allappoq.
- Utoqqatserpunga, kisianni kommunerujussuanngornitta kingorna, ukiunilu 6-8-ni uanga borgmesteriuninni Tasiilami meeqqanut suliniuterpassuarnik qulakkeerinninnikuuvunga, meeqqanut inuusuttunut mianerisarialinnut, sulianut allattorsimaffik annertuvoq.
Ikiortissaaleqineq nassuerutigigaa
Borgmesterip suliniuterpassuit akornanni innersuussutaasa ilagaat angalaqatigiissitat, taakku siorna aasakkut pilersinneqarput, katsorsaavik januaarimi ammartoq, inuusuttut illuat siorna decembarimi ammartoq, kiisalu isumaginninnermik suliassaqarfimmi sulisorineqarsinnaasut amerlineqarnerisigut. Tamatumali saniatigut tamanna ingerlalluanngisoq Asii Chemnitz Narupip (IA) nassuerutigisariaqarpaat.
- Taamaakkaluartoq inuttut kingornuttakkat aalajangiisuusumik allanngortinneqarnissaat iluatsissimanngilaq, kinguaariillu nutaat kinguaassiutitigut atornerluinerup, imminut toqunnerup aamma taamatut kingunerlutsitsivigineqarnissaat alianartorujussuuvoq…
Kommunip suliniutaa naammaginanngitsoq, borgmesterip nassuerutigaa.
- Meeqqat soorunami sumiginnarneqassanngillat aamma atornerlunneqassanngillat. Ajornartorsiuterpassuit paasiuminaattut, pisariaqartitat aamma atukkat akerleriittut, kommunimit assersuutigalugu atornerlugaasimasunut imaluunniit meeqqanut sumiginnakkanut sullissinerup aamma ikiuniarnerup pissusissamisuunnginneranik kinguneqarpoq. Tamanna uanga siulliullunga nassuerutigissavara.
- Kisianni kommuni atornerluisuunngilaq. Tamanna angerlarsimaffinni pisarpoq. Ilaqutariit qaqiseqqittariaqarpagut, ilumoorsaarneq, imminut ataqqineq, imminut pilersorneq aamma angajoqqaat akisussaassuseqarnerat qitiulerseqqittariaqarpagut.
Aaqqissuussaanernik nutaanik kissaateqartoq
Tasiilami ajornartorsiutit ataavartut ilagaa, kommunip atorfinnik inuttassarsiuminaatsitsisarnera. Ukioq manna januaarimi atorfiit marluk, tassani suleqatigiinnut aqutsisoq ilanngullugu inuttaqanngillat.
Tamanna tunuliaqutigalugu aqqutissaanngitsoq, kisianni nutaamik eqqarsartoqartariaqartoq, borgmesteri isumaqarpoq.
- Kulturimik allannguinissamik pisariaqartitsisoqarpoq. Kalaallit Nunaanni annertuumik ajortumik aamma ajunngitsumik danskit/nunani avannarlerni inuulluataarnissamut periusaat issuarsimavarput. Tassa aaqqissuussaanikkut aamma allaffissorluni ingerlatsinikkut sinaakkutik tigusimavagut. Tamanna ingerlalluanngilaq. Inuuniarnermi atukkat, geografii, attaveqaqatigiinneq, aningaasaqarnikkut nukiit, kulturikkut tunuliaquttat il. il. allaanerujussuupput.
- Maanna pissutsit atuuttut katattariaqarpagut, innuttaasut aamma kommunip akornanni suleqatigeeriaatsinik nutaanik ineriartortitsilluta, inuiaqatigiit aamma ilaqutariit ileqqunit pitsaanngitsunit ingerlaqqinnissaannut tapersersorlugit. Oqaluttuamik nutaamik ataatsimoornerup misigineranik nukittorsaasumik pilersitsissaagut. Pisortat suleriaasiata kisimi kivissinnaanngilaa.
- Suli suliassaqaqaagut
Kinguaassiutigut atornerluisarnerit aamma sumiginnaasarnerit Tasiilami kisimi ajornartorsiutaanngitsut, Asii Chemnitz Narupip (IA) maluginiaqquaa. Nunarput tamakkerlugu atuupput, aap aamma Issittumi nunap inoqqaavini allanilu.
Taamaattorli taassuma kommunip tungaanit pitsaanerusumik iliuuseqartoqarnissaa nassuerutigaa.
- Tasiilami atasinnaasumik ineriartortitsinissamut sinaakkutissiiniarluta ilungersorluta sulivugut, meeqqat pitsaasumik inuuneqarnissaa aamma nutaanik periarfissiinissaq, najukkami inuusuttunut ilinniartitsinissamut suliniutit, inunusuttut kulturiannik aamma kinaassusaannik ineriartortitsineq, taamaalillutik nuannersumik peroriartorlutik inersimasunngussammata, meeqqaminnullu toqqissisimasumik angajoqqaanngorlutik – tassanilu nukiit pitsaasut tamarmik atorfissaqartinneqarput. Suli suliassaqaqaagut. Kisianni TUNNIUTIINNARNIANNGILAGA! Taassma allatani taama naggaserpaa.