Asii: Aningaasanut inatsisissaq pillugu isumaqatiginninniarnermi aporfiit annerit ukuupput
Naalakkersuisup naatsorsuutigaa, aappaagu aningaasanut inatsisissaq pillugu tallimanngornermi inaarutaasumik isumaqatiginninniarneq sakkortussasoq.
Tallimanngorneq Inatsisartut immikkut ataatsimiiffissaattut inissinneqarsimavoq, tassanilu ullormut oqaluuserisassatuaalluni 2022-mut aningaasanut inatsisissatut siunnersuutip aappassaaneerlugu suliarineqarsnissaa.
Aningaasaqarnermut ataatsimiititaliaq siunnersuut pillugu isumaliutissiissummini saqqummiusseqqammerpoq aamma Naalakkersuisut siunnersuutigisimasaannik annikinnerusumik allannguisimavoq.
Aningaasaqarnermulli Naalakkersuisoq Asii Chemnitz Narup (IA) upperissagaanni nipituuliortoqanngilaattaani maanna eqqissisimasoqarpoq. Aappassaaneerinninnissamut akissuteqarluni allappoq, pingajussaanerinninnissap tungaanut politikkerit annertuunik suliassaqartut, tassa isumaqatiginninniarnermi maanna ingerlanneqartumi ajornartorsiutit arlallit aningaasartuutaasussat aaqqiiffigineqarnissaat suli amigaataammat.
Timmisartoqarfiit Nukissiorfiillu
Naalakkersuisup tassunga atatillugit uku eqqaavai:
- Qaleralinnut akitsuutip peerneqarnissaanut aningaasalersuinissaq
- Qaqortumi mittarfiup 1500 meteriusup sanaartornissaa,
- Utoqqalinersiat siusinaartumillu utoqqalinersiutit pitsanngorsaavigineqarnissaat
- Nukissiorfiit aningaasaqarnerata aaqqinnissaa
- Aamma partiinit saqqummiunneqartut ilassutitut kissaatit aningaasalersornissaat
Pingaartumik Qaqortumi 1,500 meteriusumik mittarfiliassap aningaasalersorneqarnissaa politikkerinit aaqqiiffigiuminaassinnaavoq, nalunaarusiarmi naapertorlugu sanaartorneq en milliard koruunit sinnerlugit akeqartussaammat.
Naalakkersuisoq tassunga atatillugut Inatsisartuni politikkerinut imatut oqariartuuteqarpoq:
- Aningaasanut inatsimmi kikkut tamarmik iluaqutissarsineqarsinnaanngillat, taamaattumik sapiissuseqarnissaq akisussaassuseqarnissarlu isumaqatiginninniarnermi aammalu isumaqatigiissuteqarluni pisariaqarpoq. Suleriaqqinnissamut taamatut sapiissuseqarnissaq akisussaassuseqarnissarlu taamaasilluni pisariaqarpoq, Asii Chemnitz Narup aappaagu aningaasanut inatsisissaq pillugu partiit amerlanerit isumaqatigiissuteqarfigineqarnissaanik neriuuteqartoq allappoq.