sumiginnaaneq

Asii: Ukiut marluk ingerlanerini iluarsineqassaaq

Isumaginninnermut aqutsisoqarfik iluarseqqinniarlugu Kommuneqarfik Sermersooq pilersaarummik suliaqarluni aallartippoq, nakkutilliinermit nalunaarusiamit taanna sakkortuumik isornartorsiorneqarpoq.

Asii Chemnitz Narup

Sulianik ilungersunartunik illersorneqarsinnaanngitsumik suliaqarneq, pisortat sumiginnaanerat aamma suliassanik aaqqipallalluni isumaginninneq.

Nuummi meeqqanut inuusuttunullu isumaginninnermik aqutsisoqarfiup isornartorsiorneqarnera taama sakkortutigaaq.

- Ajornartorsiortoqartoq ilisimavarput, kisianni taama annertutiginera tupaallaatigaara, ingammillu aamma Nuummiittut, borgmester Asii Chemnitz Narup (IA) Sermitsiaq.AG-mut oqarpoq.

Nuummi ajornartorsiutit tupaallaatigineranut atorfiit isumaginninnermut siunnersortinik ilinniarsimasunik inuttaqarnerinik pissuteqarpoq, taakku suliat inatsisillu malillugit suliarineqartussaanerat ilisimasariaqarpaat.

Ajornartorsiutit ukiaq paasigaat
Kisianni aqutsinikkut ajornartorsiutit aqutsinerlunnermik pilersitsisimapput, maannalu nakkutilliinermit ingerlatsiveqarfimmik isornartorsiornermik kinguneqarpoq.

Ukiap aamma ukiup ingerlanerani aqutsisoqarfik pissusissamisut ingerlanngitsoq politikerit paasilersimagaat, borgmesteri oqaluttuarpoq.

Taamaammat meeqqanut inuusuttunullu isumaginninnermik aqutsisoqarfik immikkoortunngortinneqarpoq, nammineq pisortaqarluni aamma politikkikkut ataatsimiitaliamik malinnaaffigineqalerluni.

- Taamaammat iliuuseqarfiginikuuara, Asii Chemnitz Narup (IA) oqarpoq.

Kisianni nakkutilliinermit nalunaarusiaq takkuppoq, ajornartorsiutillu annertunerusut borgmesterip paasilerpaa.

Aqutsisoqarfik ukiut marluk qaangiuppata iluamik ingerlasoq
Kommuni maanna aqutsisoqarfimmik ingerlalluanngitsumik iluarsiinissaminik aallartitsissaaq. Nakkutilliinermik ingerlatsivik iliuusissanik arlalinnik inassuteqarnikuuvoq.

- Qanoq ililluta ajornartorsiutit aaqqissinnaanerlugit maanna iliuusissatut pilersaarusiorsinnaanerluta pisortaqarfik oqaloqatigaara.

Sukkasuumillu siumut ingerlasoqassaaq.

- Ukiut marluk qaangiuppata ingerlalluartumik aqutsisoqarfeqassaagut, borgmesteri taama neriorsuivoq.

Kvartalit tamaasa nalunaarusiaq
Tamanna qulakkeerniarlugu politikkikkut ukkatarinninneq annertusineqarpoq. Meeqqanut inuusuttunullu ataatsimiititaliaq nutaaq maajip pingajuanni sulilertoq, tamatumani siuariartorneq malinnaavigissavaat. Tamatuma saniatigut kommunalbestyrelsi sulinermut ilanngunneqassaaq.

- Ataatsimiititaliaq siumut ingerlaneq pillugu nalunaarusiami saqqummiussisassasoq kissaatigaara.

Taamaaliornikkut ukiunut marlunnut piffissaliussap naammassineqarnissaa iluatsissasoq, taassuma ilimagaa.

Sooq malugineqarsimanngila?
Aqutsisoqarfimmi ajornartorsiutit suli ajornerusut politikerit qanoq ilillutik arajutsisimasinnaaneraat apeqqut kiserngoruppoq.

- Politikkikkut aningaasaliissutit pisariaqartinneqarnerartut paasisagut immikkoortittarnikuuagut. Meeqqanut tunngasunut sipaartoqassanngitsoq isumaqatigiissutiginikuuarput.

- Nuummi assersuutigalugu ilaqutariinnut illunik pilersitsinikuuvugut, tassani ilaqutariit ikiortariallik meeqqatillu najugaqarsinnaapput, taamaammat ineriartornermut malinnaasimalluta isumaqarpunga.

- Aningaasaliissutigisassinnut neriuutigisasi pissarsiarisimanngikkisi ilaasa tupigusuutigisinnaagaat paasisinnaaviuk?

- Uanga inissisimaffinni aalajangiinerit pisariaqartinneqartut aalajangiussimagigut attatiinnarusuppara, Asii Chemnitz Narup (IA) oqarpoq, nassuiaatigaalu isumaginninnermi pisortaqarfiup ajornartorsiutit annertussusaat paasissutissiissutigisimanngikkaat taassuma nassuiarpaa.

Aamma atuakkit:

Meeqqat illersuisuat: Marloriaammik sumiginnaaneq

Meeqqat inuunermik ulorianartorsiortillugit sumiginnakkat

Powered by Labrador CMS