Asii qaleralinnut akitsuut pillugu: Inuiaqatigiit ataatsimoorullugu pigisarivaat
Aningaasaqarnermut Naalakkersuisup Asii Chemnitz Narupip, aningaasanut inatsisissaq isumaqatiginninniutigineqartussanngorpat, Naleqqap sineriammut qanittumi qaleralinniarnermut akitsuutip peerneqarnissaanik piumasaqarnera tupaallaatiginerarpaa, isumaqatiginninniarnissamulli piareersimanerarpoq.
Partiip naalakkersuisooqataatitaqartup Naleqqap sapaatip akunnerani kingullermi nalunaarutigaa, aningaasanut inatsisissap isumaqatiginninniutigineqarnerani erseqqilluinnartumik piumasaqaateqarniarluni.
Naleqqami politikkerit sineriammut qanittumi qaleralinniarnermut akitsuutip fire procentiusup peerneqarnissaa piumasarivaat, tassa partiit arlallit IA-llu qineqqusaarnermi neriorsuutaat naapertorlugu. Akitsuut ukiumut 16 millioner koruuninik Nunatta Karsianut isertitsissutaasartutut missingerneqarsimavoq.
Aningaasaqarnermulli Naalakkersuisup Asii Chemnintz Narupip taamatut nalunaaruteqarnerat tupigusuutigaa. Taassuma oqaatigaa, Naalakkersuisut ataatsimoorlutik aningaasanut inatsisissatut siunnersuutaanni imaluunnniit Naleqqap IA-llu apriilip qaammataani naalakkersuisooqatigiinnissamik isumaqatigiissutaanni akitsuutip peerneqarnissaanik pilersaaruteqartoqarneranik allassimasoqanngitsoq.
- Aningaasanut inatsisissatut siunnersuut Naalakkersuisut tamarmiullutik siunnersuutigivaat, taamaammat naatsorsuutigaara tamattaalluta tamanna tapersersussagipput. Naleqqamit oqaatigineqartoq tusaavara, taamaammat aningaasanut inatsisissaq inissinneqarpat tamanna soorunami isumaqatiginninniutigineqassaaq. Tusagassiorfiit aqqutigalugit uanga isumaqatiginninniassanngilanga, Asii Chemnitz Narup Sermitsiaq.AG-mut oqarpoq.
Pinngortitami isumalluutit ataatsimoorullugit pigineqartut
Isumalluutinut akitsuusersueriaaseq ullumikkut atorneqartoq 2018-imi atuutsinneqalerpoq, tassani avataasiorluni aalisarnermut tamarmiusumut sineriammullu qanittumi aalisarnerup ilaanut akitsuutit atuutsinneqarput. Sineriammut qanittumi qaleralinniarnermut akitsuut aallaqqaammut fem procentiugaluarpoq, 2018-imilu siunnersuuteqartoqarneratigut fire procentimut appartinneqarluni, appaassutaasorlu 2019-imi januaarip aallaqqaataani atuutsinneqalerluni.
Avataasiorluni qaleralinniarnermit avammut toqqaannartumik tunisanut akitsuut, annerpaamik avammut tunisat 17,9 procenterisinnaavaat. Isumalluutinut akitsuusersuinermi siunertaavoq, aalisarnerup tamarmiusup inuiaqatigiit ataatsimoorullugu aalisakkatigut isumalluutaannut akiliuteqartarnissaq.
Asii Chennitz Naarupip erseqqissaassutigaa, isumalluutit uumassusillit aamma imaani nunamilu isumalluutit allat inuiaqatigiit ataatsimoorullugit pigisaattut tunngaviusumik isumaasup attatiinnarneqarnissaa pingaaruteqartoq.
- Taamaamma aamma nunamik piginnittuusinnaannginnerit tulluussimaarutigisarparput. Nunami tamatta pigisaraarput. Tassa pinngortitami isumalluutit inuiaqatigiit pigisarigaat pillugu eqqarsartaatsip attatiinnarneqarnissaa pingaaruteqarpoq, taanna oqarpoq.
Isumalluutinut akitsuusersuinermi anguniagaavoq, ataatsimoorullugik isumalluutinik atuinermit iluanaarutigineqartut aalisartunut inuiaqatigiinnullu agguaanneqartarnissaat.
Pingaarnersiuisoqartariaqartoq
Asii Chemnitz Narupip oqaatigaa, akitsuut ukioq manna aningaasanut inatsimmut ilanngunneqarsimanngimmat, imaanngitsoq qineqqusaarnermi neriorsuutigisimasanik unioqqutitsinerusoq.
- Qineqqusaaraangam inuiaqatigiinnut kissaatikka takorluukkakkalu saqqummiuttarpakka. Politikkimi suliaqarninni taamatut ingerlatserusuttarpunga. Qinerneqaraanni kissaatigisat takorluukkallu misissorneqartariaqarput pingaarnersiuillunilu.
- Qineqqusaarnermi neriorsuutigisimasat kissaatillu ukiut sisamat ingerlaneranni pingaarnerutinneqartariaqarput. maanna 2022-mut aningaasanut inatsisissaq pingaarnerutissimavarput, Asii Chemnitz Narup oqarpoq.
2022-mut aningaasanut inatsisissami utoqqarnut, meeqqanut inuusuttunullu, kulturimut, inuit pisinnaatitaaffiinik suliaqartunut kiisalu tunumi aalisagaqassutsimik nakkutilliinermut aningaasaliissutissat amerlanerusut immikkoortinneqarsimapput.