Asii pokalinnanniunnermi marloriarluni isertitsivoq

Fortuna Hjørringip U18-iisa Jyllandimi pokalinnanniunnermi Kolding IF-inngimut unammimmata Fortuna Hjørring 2-0-imik ajugaavoq sapaatip akunnerani kingullermi.

Fortuna Hjørringip isertitai tamarmik Asii Kleist Berthelsenimit isertinneqarput.

Unammisut 46 minutsini unammereersut Asii Kleist Berthelsen isertitseqqaarpoq. Unammisut 58 minutsini unammereersut Asii Kleist Berthelsen isertitseqqippoq, Fortuna Hjørring 2-0-mik siuartillugit.

Ajugaanertik nuannaarutigaa

Marloriarluni isertitsisoq Sermitsiaq.AG-mut ima oqarpoq:

- Ajugaanerput nuannaarutigaara, naak U18-mi unammisartut unammeqatigivallaarnikuunngikkaluarlugit unamminermi aalajangeeqataasinnaanera nuannaarutigaara. Pingaarnersaavorli pokalinnanerput, Asii Kleist Berthelsen oqarpoq.

Asii Kleist Berthelsenimut ukioq manna arsaaffiusoq misigaqarfiulluarsimavoq.

- Nunanut allanut unammisartut arlaleriarlunga angalaqatigaakka, Fortuna Hjørringimilu unammisartut aamma unammiartoqatigiartoqattaarlugit. Naak ukioq manna pitsaanerusumik ingerlasimasinnaagaluartoq ilikkagaqarpassuaqarnikuuvunga. Unammisartuni 1. holdimi unammisartuni isersimaqqaarneq ajorpunga, unamminerilli naammassilerneranni isertinneqartarlunga, oqaluttuarpoq.

Unamminissarpassuit pissanganartut

Ataavarnerusumik unammisalernissani anguniarlugu oqarpoq.

- Fortuna Hjørringip unammisartuini amerlanerusunik unammisaqattaaqqilerutta anguniarpara, tamanna aamma sukataarutigissavara. Aamma Fortuna Hjørring ukiuni marlunni kingullerni pissartanngornikuunngimmat pissartanngornissarput anguniarparput. Ukioq unammeqattaarfiusoq pissanganassaqaaq, Champions Leaguemi aamma peqataaqqissaagut, U18-ini U19-inilu nunanut allanut unammisartunut angalaqataasassaanga, Asii Kleist Berthelsen oqarpoq. Taanna Nuummut angerlarluni aasarsioriassaaq.