Asii Nunatta Karsianik misissueqqissaarniarpoq

Nunatta aningaasaqarnera misissoqqissaarneqassaaq.

- Aningaasartuutaasussat, aningaasaliissutaasimasut aningaasallu immikkoortitat tamarmik misissorneqassapput, taamaalilluta atorsinnaasavut qanoq annnertutiginersut ilisimalissavarput, Asii Chemnitz Narup politikkikkut kissaatigineqartut qanoq aningaasalersorneqarnissaannut erseqqissumik imaqartariaqartut erseqqissaasoq oqarpoq.

- Inuussutissarsiornerup eqaannerusumik ingerlanneqarnissaa qulakkeeqqaartinnagu aamma pisortat aningaasaqarnerat qanoq innersoq tamakkiisumik takoqqaartinnagu, atugarissaartuunitta attanneqarsinnaaneranik pitsaanerulersinneqarsinnaaneranilluunniit isumaqalissanngilagut, IA-mi politikkerit Nunatsinni aningaasaqarnermut naalakkersuinngorlaaq erseqqissaavoq

Pingaarnersiuinissaq

- Naatsorsuutigaara Naalakkersuisut tamarmiusut pingaarnersiuilluassasut. Inuttaasut atugarissaartuunissaannut atatillugu pingaarutilinnik anguniagaqarpugut. Pisortat aningaasaqarnerannik misissuinerup qanoq atuisinnaatiginerput takutissavaa. Aamma sukkut sipaaruteqarsinnaanerput, allannguisinnaanerput, annikillisaasinnaanerput, naammassisaqarsinnaanerunerput, minnerunngitsumillu innuttaasunik kiffartuussinissatsinnut pingaaruteqarluinnartunik anguniagaqarfigisatsinnut aqqutissat nutaaqqinnaat suusinnaanerinik paasisaqarnissarput eqqarsaatigalugit, Asii Chemnitz Narup nassuiaavoq.

Asiip ilisimatitsissutigaa, oqartussaaffinni tamani sulinermi tunngavissat suliarineqartussaammata erseqqinnerusumik oqaaseqartoqarsinnaanngitsoq.

Asii Chemnitz Narup illoqarfiit pingaarnersaanni ukiorpaalunni borgmesteriusimanermigut kommunalpolitikkimi misilittagartuujuvoq. Nunallu aningaasaqarneranut akisussaaffimmik tunineqarnerata saniatigut nunamut namminermut oqartussaaffimmik tunineqarsimaneranut tamanna aamma pissutaasimassaaq.

Suliassat allat marluk

Taassuma Sermitisaq.AG-mut ilisimatitsissutigaa, nunap aningaasaqarneranik misissuisoqareerpat pingaarutilinnik marlunnik aamma suliassaqarluni.

- Aappaattut nunami borgmesterit ataatsimeeqatiginiarpakka – qanoq inissisimanerat paasiniarlugu – pingaaruteqarmat pisortat aningaasaqarnerisa tamarmiusut nunallu qanoq inissisimanerata piviusorsiortumik paasineqarnissaat. Pingajuattut inuussutissarsiuteqartut ataatsimeeqatigissavakka, tassani nunami aningaasarsiornerup qanoq nukittorsarneqarsinnaaneranut isumaat tusarusullugu, Asii Chemnitz Narup ilisimatitsivoq.

Aningaasaqarnermut nunamullu namminermut oqartussaaffiit tigusimagamigit nuannaarutigisupilussuuai, tamannami tassunga ”isumalipilussuuvoq”.

Akisussaaffik annertooq

- Ukiuni aggersuni suliassatsinnut tamanut tunngaviusussaavoq nunap aningaasaqarnerata qanoq inissisimanera. Akisussaaffik annertoorujussuuvoq, pisussaaffik annertuvoq suliassarlu pimoorulluinnarpara. Nunarput ukiuni aggersuni tamaviaarlunilu oqimaattunik aalajangiiffiusartussaavoq. Iluarsisassarpassuaqarpoq, taanna erseqqissaavoq, oqaatigalugulu nunami borgmesterinik suleqateqarnissani qilanaaralugu.

- Nammineq borgmesteriuninni kommunit akornanni aamma kommunit Naalakkersuisullu akornanni nukittuumik suleqatigiittoqarnissaata pisariaqartilluinnarneqarnera misigisimavara. Borgmesterit akornanni atassuteqaqatigiinneq – neriuutigisimasattut – KANUKOKA atorunnaarsinneqarmat pitsaanerulersimaqaaq. Suleqatigiinneq maanna annertusarneqassaaq – peqatigitillugulu Naalakkersuisut kommunillu oqaloqatigiittarnerat pitsaanngorsaaffigineqassaaq, pitsaanerusumimmi suleqatigiinnerulernitsigut nunami unammilligassat aatsaat iluarsiiffigisinnaavavut. Naleqquttumik suliaqarnissaq oqartussaaqataanermillu takutitsinissaq borgmesterit pisariaqartippaat, taanna Aningaasaqarnermut Ataatsimiititaliamik suleqateqarluarnissamut qilanaartoq oqarpoq.