Asii: Kommunimut qinersineq ukiorpassuarni aatsaat taama pingaaruteqartigaaq

- Kalaallit Nunaanni allanngorfissaq tikipparput.

Kommuneqarfik Sermersuumi borgmesterip, Asii Chemnitz Narupip (IA), aviisimi Jyllands-Postenimi sapaatiummat allaatigisamini taama aallarniivoq.

Namminiilernissaq aamma nammineq aalajangiisinnaassuseq Kalaallit Nunaanni innuttaasuni amerlasoorpassuarni isumalerujussuusoq erseqqissarpaa.

- Kalaallit Nunaanni apriilip sisamaanni kommuninut qinersisoqassaaq - qinersineq Danmarkimi imaluunniit danskit tusagassiorfiini soqutigineqaranilu maluginiarneqanngitsoq - kisianni minnerunngitsumik siunissaq ungasinnerusoq eqqarsaatigalugu Danmarkimut atassuteqarnermut sunniuteqarluarsinnaasoq.

Atuaruk: Siunnersuut: Nuuk ilisimatusarnermi qitiutinneqassaaq

Pingaaruteqalissasut
- Tassami Kalaallit Nunaanni kommunimut qinersinermi politikkikkut pisut sakkortupputm minnerunngitsumik Danmarkip nunattalu akornanni pissutsit, oqaatsit, saammaateqatigiinneq aamma Naalagaaffeqatigiinnermut apeqqutit pingaaruteqalissallutik, Asii Chemnitz Narup allappoq.

Taamaammat kommunimut qineqqusaarneq maanna ingerlanneqartoq 'Kalaallit Nunaannuinnaanngitsoq, aammali Naalagaaffeqatigiinnermut' ukiuni amerlasuuni aatsaat taama pingaaruteqartigisoq isumaqarpoq.

- Tassami Kommuneqarfik Sermersuumi - Kalaallit Nunaallu tamakkerlugu - allanngorfissaq tikipparput: Siumut tikkuussisunik, innuttaasunik periarfissiisunik Nunattalu siunissaata pitsaasuunissaanik upperinnilersitsisussanik, immaqalu aamma allamiut aningaasalersuerusulernerannik suliartorusunnerannillu angusaqarniassaagut? Imaluunniit inuit imminnut ilaquttaminnullu siunissaqarsorinatik Nunatsinnit qimarrannerisa nalaani unikkaluttuinnassaagut?, taanna aperivoq.

Atuaruk: Kommuni peqquserluttuliortoqannginnissamut suliniuteqartoq

Siunissaq
Asii Chemnitz Narupip aamma Nuummi siunissami takorluukkani takutippaa.

- Ukiut arlaqanngitsuinnaat qaangiuppata nunap inui 56.000-t missaanniittut, taakkunannga 30.000 missaanniittut Nuummi, tigumisinnaanissaat takorluunngilara.

- Naagga, Kalaallit Nunaanni innuttaasut 75.000-inngornissarput neriuutigaara - taakkunannga 30.000-t Nuummi. Kisianni innuttaasugut tigummiinnarsinnaaneri, inuusuttut ilinniarluarsimasut angerlarteqqissinnaanissaat – kiisalu Kalaallit Nunaat pikkorissunut piginnaasunullu sulisinnaasunut, minnerunngitsumillu aningaasaliisussanut soqutiginartunngortinnissaa pisariaqarpoq, Asii Chemnitz Narup oqarpoq.