sipaarniartoqareersoq

Asii: Kommunalbestyrelsimi erseqqissaasoqareerpoq

Kommuneqarfik Sermersuumi borgmesteri Asii Chemnitz Narupip meeqqat atuarfiinut sipaarniartoqarnera nassuiaatigaa

- Taamaattumik isumaga malillugu Atuarfeqarnermut sipaarutissat qanoq kinguneqarnissaat Kommunalbestyrelsimut tamanut ammasumik saqqummiunneqareerlutillu erseqqissaatigineqareerput

Kommuneqarfik Sermersuumi meeqqat atuarfiini sipaarniartoqarnera pillugu paasissutissat annikippallaartut Siumumit Atassummillu Sermersuup Kommuniarni kommunalbestyrelsimi ilaasortaatitaat qisuariaateqarnikuupput, piumasaralugulu borgmesteri Asii Chemnitz Narup pisumut nassuiaassasoq.

Paasissutissiinermi Asii Chemnitz Narup ilaatigut ima oqarpoq:

- Taamaattumik isumaga malillugu Atuarfeqarnermut sipaarutissat qanoq kinguneqarnissaat Kommunalbestyrelsimut tamanut ammasumik saqqummiunneqareerlutillu erseqqissaatigineqareerput.

Siumut Atassullu kommunalbestyreliat sinnerlugu oqaaseqartoq, Siumup gruppiani siulittaasoq Martha Abelsen oqarpoq, Siumup Atassutillu kommunalbestyrelsimi paasissutissiineq pillugu oqaloqatigereerunigit, paasissutissiineq qanoq isumaqarfiginerlugu oqaaseqarumaarluni oqarpoq.

Sipaarniartoqarnera pillugu ima paasissutissiisoqarpoq:

  • 2014-imut missingersuutit suliarineqarnissaanut aallarniutitut septembarip 30-ani missingersuutit pillugit isumasioqatigiittoqarpoq.

  • Sipaarutissanut aalajangiinermi tunngavigisaq tassungalu aamma ilanngullugu sipaarutissanut siunnersuut Aningaasaqarnermut Ataatsimiititamit akuerineqarlutillu oqaluuserineqarput, tamatumalu kingorna 2014-imut missingersuutit siullermeerluni oqaluuserineqarnissaannut ilanngullugit kommunalbestyrelsimut ingerlateqqinneqarlutik.

  • Meeqqanut, Ilaqutariinnut Atuarfeqarnermullu tunngasut pillugit ikililerinissamik allattorsimaffik oktobarip 28-ani kommunalbestyrelsip immikkut sammisaqarnermini, siullermeerluni oqaluuserinninnissamut piareersaatitut, misissorneqarpoq.

  • Missingersuutit siullermeerneqarneranut atatillugu Kommunalbestyrelsip atuarfeqarnerup iluani 10.5 mio. koruuninik sipaaruteqartoqarnissaa akuersissutigaa.

  • 2014-imut missingersuutit pillugit Kommunalbestyrelsip aappassaaneerinnilluni ataatsimiinnissaanut allannguutissatut siunnersuuteqarnissamut piffissaritinneqartoq ulloq novembarip sisamaannut killilerneqarpoq.

  • Taamaattorli atuarfeqarnermut tunngasuni sipaarutissatut siunnersuutini allannguutissatut siunnersuuteqartoqanngilaq.

Atuarfeqarfinnut sipaarniartoqarnera pillugu paasissutissat kiisalu annikilliliissutit allattorsimaffiat kalaallisut qallunaatullu allaqqasut talerpiata tungaani takuneqarsinnaapput

Powered by Labrador CMS