Asii Kimimut: Siuttutut sassarnissat piffissanngorpoq
Naalakkersuisut siulittaasuat Kim Kielsen meeqqat atugaat pitsanngortinneqarnissaanut siuttuusariaqartoq Komuneqarfik Sermersuumi borgmesteri oqarpoq
Meeqqat inuusuttullu atugaat qanoq pitsanngorsarneqassanersut Naalakkersuisut iliuuseqanngippallaarsimasut Kommuneqarfik Sermersuumi borgmesteri Asii Chemnitz Narup isumaqarpoq.
Taanna Kim Kielsenimut oqariartuuteqarpoq:
- Naalakkersuisup siulittaasuata siuttutut sassarnissaa piffissanngorpoq. Arlaleriarluta Naalakkersuisunut saaffiginnissimavugut, pisariaqartitatsinnilli ikiorneqarnata – naliliinernik nalunaarusianillu tunineqaannartarpugut, tusagassiutinut nalunaarummi allappoq. Ajornartorsiutit kommuninit nammineq aaqqinneqarsinnaanngitsut oqaatigaa.
Unitsinneqartariaqarpoq
Kommuneqarfik Sermersuup oqartussat susassaqartullu tamavimmik ataatsimoortillugit – Kim Kielsen Martha Abelsenilu borgmesterit allat peqatigalugit kommunit qanoq iliuusseqassanersut eqqartorneqartariaqartullu Asii Chemnitz Narupip kaammattuutigaa.
- Pissusipalaap inunnik amerlaqisunik kinguaariinni nukillaarsaajuarnera unitsittariaqarparput. Iliuuseqarnissamut paqumisunnerit aporfigiunnaartariaqarput. Pissutsit piviusut isiginngitsuusaaginnarsinnaanngilavut. Nuna tamakkerlugu ajunaarnersuartut pissutsit ipput, nappaalanersuaq timikkut tarnikkullu nukillaarsaasoq, meeraanermiit innarlerneqarneq, imminut pisuutinnermik, annilaangarujussuarnermik, inuttut kinguaassiuutitigut kinaassuseerunneranik inuiaqatigiillu akornanni tatiginnissinnaajunnaarnermik kinguneqartoq, ikiaroornartumik imigassamillu atornerluinermik, nakuusernermik, imminut ajoqusernissamik imminullu toqunnissamik kinguneqartitsisoq. Tamanna unitsinniarli, tassa, borgmesteri oqarpoq.
Oqaloqatigiinnerit aallartinneqartariaqartut
Inuit Ataqatigiit Inatsisartuni Ilaqutariinnermi, Peqqissutsimullu Ataatimiititaliami ilaasortat kaammatuutigaat piaartumik Naalakkersuisut kommuunillu oqaloqatigeeqqullugit, ukiunullu arlalinnut atuuttussamik pilersaarusioqatigeeqqullugit.
- Tassanilu iliuusissat kommuunit qanimut peqatigilluinnarlugit ilusilersorneqartariaqarput, Qallunaat Nunaanniit ikiortissarsiornermi piginnaasat ikiuutaasinnaasullu sorliit qanorlu annertutigisut pisariaqarnersut qulaajaavigeqqullugit. Ukioq meeqqat ukiuattut Naalakkersuisut Siulittaasuata suaarutigisaa oqaasiinnartigut pinnani timitaliinertalimmik piviusorsiortumillu piviusunngortinneqartariaqarpoq, Stine Egede, Aqqa Samuelsen aamma Mikivsuk Thomassen tusagassiutinut nalunaarummi allapput.
Akisussaaffik kommuuniniiginnarnissaat kissaatigaat.
- Isumaginninnikkut akisussaaffik Naalakkersuisoqarfimmut nuutsinneqassagaluarpat qitiusumi allaffissornikkut annertuumik pilersitsineruinnassaaq, maannakkullu ikiortarialinnut iluaqutaanaviarnani kinguarsaataannaassaaq, Inuit Ataqatigiinnit allapput.