Asii isumaqatiginninniarnerit pillugit: - Unneqqarittariaqarpugut
Inatsisartut aningaasanut inatsisissatut siunnersuut marlunngornermi siullermeersumik oqaluuserissavaat.
Politikkerit aappaagumut aningaasatut inatsisissatut siunnersuut marlunngornermi siullermeerlugu suliarileunikku, ukiaanerani ataatsimiinnermi suliassat annersarigunagaat aallartissavaat.
Naalakkersuisut coronap malitsigisaanik aningaasaqarnerup sukannersumik aqunneqarnissaa anguniarpaat, Aningaasaqarnermullu Naalakkersuisut Asii Chemnitz Narupip (IA) saqqummiussissummini politikkerinut erseqqissumik kaammattuutigaa, suliniutissat nutaat qanoq aningaasalersorneqarnissaannik siunnersuuteqartassasut.
Ilanngullugu erseqqissaassutigaa, Nunatta Karsia isertitaqarnerulissappat allatut eqqarsartoqartariaqartoq:
- Nunatta isertitai annertuumik amerlanerulersinneqassappata, nunatut allaanerusumik iliuuseqarlutalu inuiaqatigiinni ullumikkornit inuussutissarsiortunit, suliffeqartunit aamma ilinniagaqartunit isertitanik qulakkeerinninniarluta suliaqarnerusariaqarpugut.
- Aningaasaqarnermut Naalakkersuisutut manna pillugu unneqqarilluinnarnissarput Naalakkersuisut tatiginartuunerannut pingaartutut isigaara, Asii Chemnitz Narup ullumi oqallinnissamut saqqummiussissummini allappoq.
400 millioner koruunit timmisartoqarfissamut?
Politikkerit sineriammut qanittumi qaleralinniarnermut akitsuut akerleeriissutaaqisoq ilaatigut aaqqiissutissarsiortussaavaat.
Partii naalakkersuisooqatigineqartoq Nalera akitsuummut akerliulluinnartuuvoq, Asii Chemnitz Narupilli akitsuusersuisarneq illersorlugu oqaatiginikuuaa. Akitsuut 16 millioner koruunit missaannik isertitsissutaasarpoq.
Aningaasaqarnermulli unammillernartut annerit ilagaat Qaqortumi timmisartoqarfiliorniarnermut tunngassuteqartoq:
- Taakku saniatigut Qaqortumi mittarfissap aningaasalersornissaanut allannguutissatut siunnersuummik saqqummiussinissaq pisariaqalersinnaavoq, tamatumanilu taanna pillugu politikikkut isumaqatiginninniarnerit apeqqutaassapput. Mittarfimmik 1500 meterisut takissusilimmik politikikkut aalajangerneq attanneqassappat, sanaartornissamut aningaasaliissutit 400 millioner koruunit missaannik amerlineqarnissaat pingaarnersiuinermut ilanngunneqartariaqassaaq, Asii Chemnitz Narup ullormi oqallinnissamut saqqummiussissummini allappoq.
Aningaasanut inatsisissaq pillugu isumaqatiginninniarnerit marlunngornermi nalunaaqutaq aqqanernut aallartinneqassapput.