Asii: Eqqarsartaatsit ileqquliutiinnakkat iperartigit

Ilinniartitsisut angajoqqaallu 100-t missaanniittut Kommuneqarfik Sermersuup meeqqat atuarfiinut sipaarniarnera akerleralugu akerliussutsimik takutitsipput.

Kommuneqarfik Sermersuumi borgmesteri Asii Chemnitz Narup kommunalbestyrelsimi ilaasortat peqatigalugit akerliussutsimik takutitsisut anillaffigaat. Borgmesterip akerliussutsimut takutitsisut ilaatigut ima oqarfigai:

- Uagut naleqqussarniarnitsinni, nutaamik eqqarsarnissaq pisariaqarluinnarpoq, minnerunngitsumik atugarissaarnermik aaqqissuussaanerput attatiinnassagutsigu – allatut oqaatigalugu: akisussaaffitta naammassiniarnerini suleriaatsit allaanerit, akikinnerit pitsaanerillu ujartorariaqarpagut, taamatuttaaq susassaqarfiit eqqarsaqatigiillutik suleqatigiinnerusariaqarput. Ukiuni aggersuni suliassagut pingaarnerit tassungarpiaq sammipput – tamatsinnullu atuuppoq: qinikkanut ilissinnullu ilinniartitsisunut. Eqqarsartaatsit ileqquliutiinnakkat iperarlugit nutaamik isumalioqatigiinnissamut piffissanngorpoq.

Akerliusut apeqqutigisaat kineqassapput
2014-imut missingersuutit kommunalbestyrelsimi isumaqatigiittumik akuersaagarai, kommunimi atugarissaarnermik aaqqissuussineq attatiinnarniarlugu sipaarniartariartoqartariaqarsimalluni Asii Chemnitz Narup oqarpoq.

- Maluginiarpara anigaasat sanaartugassanut immikkoortitavut amerlavallaarnerarlugit uparuaasoqartoq. Tassunga imatut oqarusuppunga: suliffissaaleqineq malunnaatilimmik akiorniassagutsigu, aningaasarsiornerup qaffannissaa qulakkiissagutsigu, inissarsiortunut tamanut naammaginartunik inissaqartitsissagutta , meerartatsinnut pitsaasunik meeqqeriveqassagutta utoqqartatsinnullu utoqqaat illuinik sanaartussaguta – taava anigaasat amerlasuut sanaartortitsinissamut atorfissaqartippagut.

Borgmesteri innuttaasunik tamanut ammasumik ataatsimiigiaqqusissssaaq paatsuungasssuterpassuit erfattut akissutisineqarniassammata.