Asii Chemnitz Narupip ineqarneq pillugu suliaq ajuusaarutigaa

Kommuneqarfik Sermersuumi borgmesteriusimasoq Asii Chemnitz Narup, nakkutilliisut ineqarneq pillugu suliamik isornartorsiumminnik saqqummeereersut, Inatsisartuni Siumumit tunuaqquneqarpoq. Maanna tamatumunnga akissuteqarpoq inissianillu attartortitsisarneq pillugu ingerlatsisimanermut akuusimanini ajuusaarutigalugu.

Nakutilliisut Kommuneqarfik Sermersuumi ineqarneq pillugu suliami aalajangiussartik marlunngornermi unnukkut saqqummiutereeraat borgmesterit marluk allaffillu ataaseq kanngusuusarunarpoq.

Aalajangiinermi kommunip inissianik attartortarnermi periuserisimasaa, Asii Chemnitz Narupip borgmesteriunerani aallartinneqarsimasoq 2020-milu nakkutilliisut periutsimik unitsitseqqusinissaasa tungaanut ingerlanneqarsimasoq sakkortuumik isornartorsiorneqarpoq.

- Nakkutilliisut isornartorsiutaasa atuaqqissaarnissaannut piffissaqarsimavunga, kommunillu ingerlatsisimanera inatsisinik unioqqutitsisuusoq taakku inerniliuppaat, ingerlatsinermilu periuserineqarsimasut ilaat allatut ingerlanneqarsinnaasimagaluarput, Asii Chemnitz Narup tusagassiorfinnut nalunaaruteqarluni allappoq.

Naalakkersuisutut tunuarnianngittoq

Borgmesteriusimasoq taamatut nalunaaruteqarpoq, Siumumi siulittaasup Erik Jensenip suliaq pissutigalugu Asiip naalakkersuisutut tunuarnissaa pingasunngormat piumasarimmagu. Taamatulli piumasaqarnera Asii Chemnitz Narupimit akuerineqanngilaq, Inatsisartummi ataatsimiittarfiaannit oqaatigaa, Naalakkersuisut Siulittaasuata Múte B. Egedep naalakkersuisutut atuutiinnarnissaa kissaatigippagu tunuarniarani.

- Nakkutilliisut isornartoriutaat pimoorulluinnarlugu tiguara. Taamaammat ilisimalikkakka sulinerma ingerlateqqinneqarnerani atorniarpakka, taanna allappoq.

Borgmesteriusimasup oqaatigaa, kommunip periusermik pineqartumik atuilersimaneranut pissutaasoq, kommunimi pingaartumillu Nuummi nutserfigineqaqisumi inissaaleqisoqangaatsiarnera.

Inatsisitigut tunngavissaqarluarlutik naliliisimasut

Asii Chemnits Narupip oqaatigaa, isornartorsiummi kikkorpiaat isornartorsiorneqarnersut aamma isornartorsiorneqartut ataasiakkaat piffissap qanoq ilinerani pisarsimanersut takuneqarsinnaanngitsut.

- Borgmesteriuninni soorunami politikkerit atorfilittallu oqaloqatigiittarpugut, taamalu nalilersimallutigut inatsisitigut tunngavissaqarluarluta, taanna allappoq.

Isornartorsiummi maanna borgmesteriusoq Charlotte Ludvigsen, allaffissorneq borgmesteriusimasorlu pineqarnersut takuneqarsinnaanngikkalluartoq, Asii Chemnitz Narupip suliamut akuusimanini ajuusaarutigaa.

- Soorunami takuneqarsinnaavoq isornartorsiorneqartut ilaat borgmeriuninnut attuumassuteqarput. Taamaammat ajuusaarutigiinnarsinnaavara, isumaginnissimanerup inatsisitigut nalilerneqarsimanerata eqqortuunnginnera, aamma borgmesteriuninni periuserineqarsimasut eqqortumik isumaginninnissamut naapertuuttuusimannginnerat ajuusaarutigilluinnarpara, borgmesteriusimasoq.

- Akisussaaffiga qimarratigissanngilara, erseqqissaatigiinnarsinnaavarali taamatut ingerlatsisimanermut pissutaasoq ataasiinnaasoq: Piffissami inissanik amigaateqarfiusupilussuarmi innuttaasullu amerliartuinnavinneranni inissanik atorneqarsinnaasunik amerlanerpaanik pissarsinissap qulakkeerneqarnissaa.

Powered by Labrador CMS