Asii borgmesteritut tunuarpoq

Kommuneqarfik Sermersuumi kommunalbetyrelsip ataatsimiinnerani Asii Chemniitz Narup (IA) borgmesteritut tunuassaaq. Tamanna tusagassiutinut nalunaarummi oqaatigaa.

- Kommuneqarfik Sermersuumi politikkikkut suleqatigiinnerput Demokratit taamaatippaat, uannik inuttut tatiginnikkunnaarnertik peqqusiullugu. Tamaasiornerat soorunami ajunngilaq. Ukuli uanga oqaatigiinnassavakka:

- Sisamanngornermi ullaakkut suleqatigiinnerput Demokraatit atorunnaarsinniarlugu nalunaarutigimmassuk ingerlaannavillunga neqeroorutigaara uanga borgmesteritut ingerlaannarlunga tunuarsinnaallunga. Suleqatigiinnitsinnut, taamatumuunakkullu politikkikkut suliatsinnut pingaarutilimmut, uanga inuttut akornutaarusunnginnama, kissaatigigakkulu suleqatigiinnitta ingerlatiinnarneqarnissaa.

- Ataatsimeeqatigiinnitsinni paasivara Demokratit kissaatiginngikkaat uanga borgmesteritut tunuarnissara. Aaqqiissutaasinnaagaluartoq uanga tunuarlunga, IA-lli Demokraatillu suleqatigiinnerat ingerlaannassasoq, allamik borgmestereqarlerluni, Demokraatit kissaatiginngilaat.

- Soorunami tamanna uanga eqqumiigivara. Politikkikkut suliniutitta imai siunertaalu, politikkikkut suleqatigiinnissatsinni isumaqatigiissummiittut, suli pingaaruteqarlunilu politikkikkut isumaqassappata, ajornartorsiullu uanga inuttannut killilerneqarsinnaappat, taava nunarsuarmi maani ajornannginnerpaassangaluarmat uanga tunuarnissannik neqeroorutiga akuerisimasuuppassuk.

- Neqeroorutigigaluakkamali kajuminnarsimannginneranut nassuiaatissaa allarluinnarmiissorinarpoq.

Demokraatit isornartorsiorpai.

- Sisamanngornermi ullaakkut Demokraatinik ataatsimeeqateqarninni ilanngullugit aamma uanga parteeqatikka Inatsisartut oqaluttarfianiit oqaasii uparujussuarpaat. Ajunngilaq. Oqaluttarfiilli allat atorlugit allat qanoq oqaaseqarneri uanga akisussaaffigisinnaanngilakka. Uanga nammineq oqaasissakka anissinaavakka.

- Ajornartorsiutinut marlunnik qinigaaffeqarnerup pilersittagaanut pisoq manna assersuutaalluartuuvoq, tassami Demokraatit Kommuneqarfik Sermersuup kommunalbestyrelsiani ilaasortaatitaasa immikkoortissinnaarpasinngimmatigit, immikkoorterusunnagilluunniit, kommunalbestyrelsimi sulinertik – aamma Inatsisartuni sulinertik, taamaattumillu ulluinnarni sulinermi politikkikkut misigissutsitsigullu suut tamaasa ularullugit akuliussuullugit pimmatigit.

- Qanoq ingerlaniarnertik Demokratit ersarissorsuarmik ajornartorsiutigaat, politikkikkullu illorsuarmi sorlermi issianertik nalulertarlugulusooq. Ajornartorsiut pilerpoq partiip ilaasortaatitai marlunnik qiningaaffeqarmata, immikkoortissinnaanagillu nassaq sorleq atorneritsik, issiavillu sorleq Issiavigineritsik.

- Mamiatsaatigisimasaasa aappaa tassaangunarpoq Tasiilami meeqqat kinguaassiutitigut atornerlunneqarsimasut sumiginnarneqarsimasullu pillugit oqallinnernut annertuseqqittumut qisuariarnera. Aamma ajunngilaq.

- Eqqumiigineranulli soorunami peqqutigaara aalajangiinerni tamani Demokraatit peqataasarsimammata, Kommuneqarfik Sermersuullu suliniuterpassui, aningaasat suliassanut immikkoortinneqartut, kingullertigullu nunatsinni borgmesterinik Naalakkersuisunillu peqateqarluni suliniutissat, ilisimaarilluarmatigit.

Demokraatit Inatsisartuni sulineq aamma kommunalbestyrelsimi sulineq immikkoortinnagit sulisut isumaqarpoq.

- Demokratit Inatsisartuni Siumumik ersarissumik qaninnerusumik suleqateqaleriartornerat aamma Kommuneqarfik Sermersuumi taamatut ilusinikkiartuaarpoq, Siumup Doris Jakobseniata ersarissumik nalunaarutigaa Kommuneqarfik Sermersuumi borgmesterinngorniarnini, kommunalbestyrelsimullu qinerseqqinnissap tungaanut ilaatigut Inatsisartuni ilaasortaanini atorlugu Kommuneqarfik Sermersooq isumaginninnikkut akisussaaffiiarniarlugu. Nunarsuatsinni sumiiffinni allani taama iliorneq pissaanermik sangutitsinertut taaneqassagaluarpoq.

- Inatsisartuni Siumumut tapertaasutut, Kommunalbestyrelsimi Inuit Ataqatigiinnut suleqatigiinnitsinnullu, Demokratinit sakkortuumik suusupaginninneruvoq, Inatsisartuni Kommuneqarfik Sermersuumik saassussinerit Demokraatit tusaanngitsuusaaginnarmatigit. Kommuneqarfik Sermersuup akisussaaffiiarneqarnissaanik Inatsisartuni allat qunusaarinerisa nalaanni, Demokraatit inussatik paarlallugit issiaannarput sunatik. Natsap sorliup atinissaanut paatsiveerulluinnarsimarpasipput.

- Demokraatit Inatsisartuni sulinerannut isornartorsiuinera aalajangiusimavara: Nunap aningaasaqarniarnera aqunneqarsinnaasariaqarpoq, aningaasalersuerusuttut eqqissimatittariaqarput, inuussutissarsiornikkut siunissamut upperinninneq tatiginassuserlu pigineqartuartariaqarput, kommuniniillu sulissutiginiakkat taakkulugu aningaasalersornissaat tatiginassuseqartittariaqarput. Isornartorsiutikka attappakka.
Kommuninik suleqateqarsinnaaneq Naalakkersuisut aqqutissiuutinngilaat, kommuninili ilinniarluarsimasunik naammattunik sulisoqalersinnaannginneq atornerlullugu innuttaasut erloqissutaat imminerminnut attuutinnaveersaarpaat.

- Isumaqarpunga Kommuneqarfik Sermersuup aamma Nuup – aammaluni nunatta tarmarmi – siunissaata ineriartortinneqarnera pingaaruteqarpallaartoq, pissaanilerngusaannerup taamaattup tamatta siunissatsinnut aalajangiisuutinnissaanut. Demokraatilli aalajangernerisa takutippaat, meeqqat atugarisaat tunulliutillugit, pissaanilerngusaanneq salliutikkitsik.

- Isumaqarpunga meeqqanik inuusuttunillu sumiginnakkanik amerlaqisunik ikiuiniarnitta ineriartortinneqarnera, Siorarsiorfillu aqqutigalugu inissialiortitsinerit paaqqinnittarfiliornerillu, mittarfissualiornissap umiarsualiveqarnerullu ineriartortinnissaat, suliniutillu allarpassuit pilersitat, pilersaarutillu, kommunitsinni inuiaqatigiinnilu innuttaasut periarfissaasa kivinniarneqarnerinik nassataqartussat pingaaruteqarpallaartut, tamakkorpassuit unitsiinnarneqarlutilluunniit taamaatiinnarneqarnissaat, politikkikkut pissaanilerngusaanneq – uangaluunniit inuttara – peqqutigalugit.

- Politikkikkut sulineq angusallu tunulliutillugit, pissaaneqarniarneq salliutinniarlugu Demokraatit aalajangernerat ajuusaarutigaara – naak suliat inernissaat piffissaq sivisooq atoqqaarlugu aatsaat takuneqarsinnaalertaraluartut.

- Ukiorpassuarni politikkeriuvunga, Kommuneqarfik Sermersooq, uangalu inuttut, akerlilersorlugu Naalakkersuisut suleriusissamittut ilusiligaat, Demokraatinit suleqateqarani ukiuni tulliuttuni ajornartorujussuanngortussaavoq, innuttaasunullu iluaqutaasussamik akaareqatigiilluni suleqatigiinnissaamut uanga minnerpaannguamilluunniit akornutaarusunngilanga.

Nutaarsiassat

Tasiilami anorersuarnissaanik aarlerisaarut

DMI Tasiilami Kategori 2-mik sakkortussuseqartumik anorersuarnissaanik aarlerisaarivoq, 6. marsi 2024 nal. 09.00-imiit 7. marsi 2024 nal. 01.00-imut atuuttussamik. Anorersuaq sekundimut 25...

Snow Fest-imi iluatsilluartumi nutaaliorsinnaaneq nuannaarutigineqarpoq

Aputit, nipilersortut ataatsimoornerillu nuannersut sammereerlugit ukioq manna Snow Fest sapaatip akunnerata naanerani naammassineqarpoq. Pisortatigoortumik ajugaasup...