Skip to main content

Asii akissuteqarpoq: Isornartorsiorneq pitsaasuunngitsoq

Siumumi politikerit nammineerlutik pingasoriarlutik taasissutigisimasartik atuarluarsimanngikkaat, borgmester Asii Chemnitz Narup (IA) isumaqarpoq

  Sermersuumi borgmesteri, Asii Chemnitz Narup (IA), Kommuneqarfik Sermersuumi Siumup gruppianeersut ajortumik isornartorsiuisut isumaqarpoq.

Kommunalbestyrelsimi ilaasortat Ane Egede Mathæussen (S) aamma Petere Davidsen (S), ammasumik allagaqarnerminni Siorarsiorfimmik suliniuteqarnermut tunngatillugu  borgmesterip kommunalbestyrelsi eqqortumik paasissutissiisimanngitsutut pasillerpaat.

Atuaruk: Unnerluut: Nuummi borgmesterip kikkut tamaasa uukapaatikkai

- Paasissutissat tamarmik pigaat
Kisianni isornartorsiuneq tunngavissaqanngilaq, Asii Chemnitz Narup isumaqarpoq.

- Suliassaq sukumiilluinnartumik kommunalbestyrelsimi suliarineqarsimavoq, ilaasortallu 19-iusut tamarmik, taasisitsinerit tamaasa, akuerseqataallutik taaseqataasarsimapput. Suliap aallartinneranili Ane Egede Mathæussen politikkikkut aqutsisoqatigiinnut ilaavoq, paasissutissallu uanga pissarsiarisartakkama asserluinnaanik paasissutissinneqartarluni, taanna oqarpoq.

Suliniut pillugu pingasoriarlutik taasisut
Tamanna tunuliaqutigalugu isornartorsiorneq 'pitsaanngitsutut' isigaa.

Atuaruk: Per Berthelsen Siumumit anivoq

Piareersarnerup suliarinnittussarsiorneranut piumasaqaateqanngitsoq
Siumumi politikerit marluk kommuni nakkutilliisoqarfimmut unnerluutigaat, piareersaataasumik sulinermut atatillugu sanaartugassanik suliarinnittussarsiornermut inatsit unioqqutinneqarsimasoq isumaqaramik, tassani kommuni siunnersortimik suliaqartitsisimammat.

Piareersaatitut suliaqarneq pineqartillugu sanaartugassanik suliarinnittussarsiornissamut piumasaqaateqanngilaq.

- Taamaattumik tupinnarpoq kommuninut nakkutilliisoqarfiup piffissaanik taamatut atulussinnartitsiniaanerat. Saniatigut erseqqissassavara suliniutip aningaasalersorneqarnissaanut suliassat aamma sanaartugassanut suliassat ataasiakkaat aallartilerpata soorunami suliarinnittussarsiuunneqarumaartut, borgmesteri oqarpoq.

Atuaruk: Siunnersortit suliaat millionilik

Qineqqusaarnermi periuseq
Siumut qineqqusaarnermi periutsimik misigeriigaanik atuisut taanna illuanik isumaqarpoq.

- Aatsaat qineqqusaalinngilanga, maannamullu Siumumut ileqquliunneqaannarsimangunarpoq qinersinissaq qanillilivitsillugu malittarisassanik unioqqutitsisutut uannik pasilliisarnerat. Ukioq mannalumi allaanerussuteqanngilaq, Asii Chemnitz Narup (IA) oqarpoq.

Siumumi politikerit taakku marluk siulittaasortik, Kim Kielsen, Siorarsiorfimmik suliniummik ammasumik isornartorsiornikoq isumaqatigissallugu Nuup ineriartortinnissaanik pingaartitsinerusut taanna isumaqarpoq.

Velkommen til debatten
  • Oqallinneq malinnaaffigalugulu peqataaffigerusukkukku cookie akuerissavat.
  • Sermitsiaq.AG-p atuartartut akunnerminni isumaqatigiinngikkaluarpataluunniit kissaatigaa, pitsaasumik oqallittoqartarnissaa. Oqallinnissamut malittarisassavut unioqqutinneqarpata oqallinnermut peqataaqqusaajunnaartitsisoqarsinnaavoq.oq .
  • Peqqarniitsumik oqaaseqartoqarsimaneranik nalunaarutiginnittoqarsinnaavoq, "rapporter" toorlugu imaluunniit ”markere som spam” toorlugu”.

Forsiden lige nu

SENESTE NYHEDER