Asiaq nukingertumik 3 millioninik aningaasaliiffigineqarpoq

Juulli ullunik marlunnik sioqqullugu Aningaasaqarnermut Akileraartarnermullu Ataatsimiititaliap suliaq nukinginnartoq akuerisariaqarsimavaat, tassani Naalakkersuisut ingerlatseqatigiiffimmut nammineq ingerlasumut Asiamut 2,78 millionit koruuninik tapiliussamik aningaasaliisoqarnissaanik qinnuiginnipput.

Coronap nunarsuaq tamakkerlugu tunillaassuunnerani Asiaq malunnaatilimmik kaaviiaartitatigut appariarnermik nalaataqartoq, Bo Naamansen nassuiaavoq.

Tapiliussamik aningaasaliisoqarnera minnerunngitsumik coronap nunarsuaq tamakkerlugu tunillaassuunneranik pissuteqarpoq, tamanna Asiap nunap assiliornermik, silap pissusianik nalunaarsuinermik aamma nunap iluani pissutsinik immikkut ilisimasanik suliaqartup kaaviiaartitaanik appariartitsivoq.

Atuisut pingaarutillit
Asiami pisortaq Bo Naamansen itisiliivoq:

- 2020-mi suliatta annertussusaannut corona sunniuteqartorujussuuvoq. Atuisugut pingaarnerit uagutsinnik ikiorserneqarnissamik tunuarsimaartorujussuupput, tamannalu kaaviiaartitatta malunnaatilimmik appariarneranik kinguneqarpoq, pisortaq taama nassuiaavoq.

Ingammik Namminersorlutik Oqartussat, kommunit aamma Nukissiorfiit, sulianik nutaanik aallartitsinissamik tunuarsimaarsimapput.

- Aammattaaq aningaasaateqarfiit suliniutinut ilisimatusarnermut tunngasunut aningaasanik agguaanernik unitsitsipput, tamannalu aamma malugisinnaavarput, Bo Naamansen ilisimatitsivoq.

Pisortaanermini siullermeerluni immikkut ittumik aningaasaqarnikkut ikiorserneqarnissamik pisariaqartitsisoqarsimavoq.

Aningaasat ukunanngaanneerput
Asiamut aningaasaliissutit kontut assigiinngitsut sisamat aallerfiginerisigut pivoq, Akileraartarnermut Aqutsisoqarfik aamma Naatsorsueqqissaartarfik ukiut siuliini aningaasarpassuit pissarsiarinngitsoortariaqarpaat:

Kontut uku eqqugaapput:

  • Nuna tamakkerlugu pilersaarusiorneq 100.000 kr.-nik appaaffigineqarpoq
  • Ingerlatsinermut sillimmatit 880.000 kr.-nik appaaffigineqarput
  • Naatsorsueqqissaartarfik 800.000 kr.-nik appaaffigineqarpoq
  • Akileraartarnermut Aqutsisoqarfiup allaffia 1.000.000 kr.-nik appaaffigineqarpoq
Powered by Labrador CMS