Asiami pisortat nikittut: Naalakkersuisoqarfimmi pisortaasimasoq atorfinitsinneqartoq
Nunalerinermut, Imminut Pilersornermut, Nukissiutinut Avatangiisinullu Naalakkersuisoqarfimmi pisortaasimasoq maanna ilaatigut Asiami silap pissusianik, silamik, nuna pillugu paasissutissanik nunap assiliornermik suliaqalissaaq.
Asiaq nutaamik pisortartaassaaq, Nunalerinermut, Nukissiutinut Avatangiisinullu naalakkersuisoq, pisortanngortup pisortarisimasaa taama ilisimatitsivoq.
44-nik ukiulik Mette Skarregaard Pedersen ukiuni arfineq-marlunni kingullerni Nunalerinermut, Nukissiutinut Avatangiisinullu Naalakkersuisoqarfimmi pisortaasimasoq, tassanilu ilaatigut Upalungaarsimanermut ataatsimiititaliarsuarmi Karrat Kangerluanni pinngortitami ajunaarnersuaqarnerup nalaani 2017-imi kingornalu siulittaasuuvoq.
- Naalakkersuisoqarfimmiinnera nuannareqaara, tassanilu suliinnarusukkaluarlunga, kisianni ukiuni aalajangersimasuni atorfeqartitaanera qaangiuppoq, Naalakkersuisullu naalakkersuisoqarfimmi pisortamik allamik atorfinitsitsiniarlutik aalajangerput, Mette Skarregaard, Sermitsiaq.AG-mut taama oqarpoq.
Natuk Lund Olsen naalakkersuisoqarfimmi pisortatut atorfinitsinneqarsimasoq Naalakkersuisut septembarimi ilisimatitsipput, taanna Mette Skarregaardip kingoraartigaa.
Pitsaasumik aqutsineq ukkataralugu
Mette Skarregaardip atorfimmi nutaami aallartinnissani qilanaaraa.
- Nutaamik misiliinissaq soqutiginarpoq, Asiamilu siuttunngornissannut qilanaaqaanga, Asiamilu suliat pingaarutillit suliarineqartut ataqqisorujussuuakka.
Pisortaq nutaaq nunalerinermi cand. scient.-tut ilinniarsimasoq 1. decembar 2022 aallarnerfigalugu atorfittaamini sulilissaaq. Asiaq angusaqarfiulluni suleqatissatut piukkunnartuunissaa aamma sulisunut pitsaasumik avatangiiseqarnissaa, suliassami pingaarnerit ilagissagaat taanna oqaluttuarpoq.
- Aqutsineq pitsaasoq, ineriartortitsineq angusaqarluarnerlu pingaartitaraakka. Asiami immikkut ilisimasallit pikkorissut suleqatigilernissai, taakkulu peqatigalugit suliffeqarfiup ineriartortinnissaa qilanaaraakka.
Kangiani, Avannaani Kitaanilu misilittagalik
Mette Skarregaard Pedersen 2005-imi Kalaallit Nunaanukarpoq, ukiunilu siullerni Ittoqqortoormiini Ilulissanilu najugaqarluni. Siusinnerusukkut Ilulissat Kangia-ni avatangiisinut pisortatut site manager-isullu atorfeqarluni aamma Namminersorlutik Oqartussani avatangiisinut upalungaarsimanermullu immikkoortortaqarfimmi immikkoortortaqarfiup pisortaanikuulluni.
- Nuannaarutigivara Mette Skarregaard Pedersen atorfinitsissinnaagatsigu. Sulianut tunuliaqutagissaartorujussuuvoq aamma inuiaqatigiinnut ilisimaarinnilluartuulluni. Matuma saniatigut ukiuni arlalinni aqutsisutut misilittagaqarpoq, pilersaarusiortumillu eqqarsartarpoq aamma inerniliinernut ineriartornermullu akisussaaffimmik tigusineq sungiusimavaa, Nunalerinermut, Imminut Pilersornermut, Nukissiutinut Avatangiisinillu Naalakkersuisoq Kalistat Lund oqarpoq.
Asiaq ilaatigut silap pissusia aamma sila, hydrologii, nuna, nunap sannaanut paasissutissat aamma nunap assiliornerit suliarisarpai.