Aserorterisaqattaartut: Kommune Politiillu aaqqiiniarlutik suleqatigiipput
Kalaallit Nunaata Politiivisa aserorterisoqarsimatillugu suliat ataasiakkaarlugit paasiniaaffigaat. Meeqqalli inuusuttuaqqallu sulianut attuumassuteqarsinnaasut kommunip politiillu suleqatigiillugit nakkutigaat.
Meeqqat inuusuttuaqqallu eqimattat aalajangersimasut ilimanaateqarluinnarput Nuummi atuarfinni meeqqerivinnilu aserorterisimasut.
Kalaallit Nunaata Politiivisa pinerluttulerinermi pinaveersaartitsinermut immikkoortortaqarfia taama naliliivoq.
- Nuummi politiit suliani paasiniaanerup saniatigut, kommuni qanimut suleqatigaa meeqqat inuusuttuaqqallu atuarfiit meeqqeriviillu igalaavinik aserorterisimasutut ilimagineqartut ikiorsernissaat pillugu, Mikkel Svendsen, Kalaallit Nunaata Politiivisa pinerluttulerinermi pinaveersaartitsinermut immikkoortortaqarfiani pisortaq ilisimatitsivoq.
Taanna ilisimatitsivoq meeqqat inuusuttullu 15-it ataallugit ukioqartut aserortereqataasimasut. Politiit Kommuneqarfik Sermersoorlu suleqtigiillutik suliani iliuusissanik suliaqarput.
- Suleqatigiinnermi paasiniarneqarpoq meeqqat inuusuttuaqqallu kikkorpiaat peqataanersut, taamatullu eqimattani peqataasut malunnaateqarnerusut iliuuseqarfiginissaat, pinerluttulerinermi pinaveersaartitsinermut immikkoortortaqarfimmi pisortaq oqaluttuarpoq.
Kommune ikiuutissanik aallartitsivoq
Kommuneqarfik Sermersuumi Meeqqanut Ilaqutariinnullu Ingerlatsivimmi pisortaq, Martha Lund Olsenip uppernarsarpaa Nuummi kommunip illuutaanni aserorterisoqarsimanerit pillugit kommuni politiinik suleqateqartoq.
Maannamut atuarfiit ikinnerpaamik pingasut aamma meeqqeriviit ikinnerpaamik marluk igalaajarlugit aserorteriffigineqarsimapput.
Kommuneqarfik Sermersooq suliani ataasiakkaani oqaaseqarsinnaanngilaq. Meeqqalli inuusuttuaqqallu aserorterisimatillugit kommuni arlalinnik suliniuteqartartoq ilisimatitsivoq:
- Soorunami angajoqqaajusut siulliullugit attavigineqartarput. Aammali angajoqqaat ilaatigut ajuusaarnaraluartumik qisuariarneq ajorput, taamaattoqartillugu inuusuttunut siunnersortit suliamik tigusisariaqartarput, Meeqqanut Ilaqutariinnullu Ingerlatsivimmi pisortaq, Martha Lund Olsen oqaluttuarpoq.
- Pisariaqartillugu meeqqat inuusuttuaqqallu angerlarsimaffiup avataanut inissinneqartariaqartarput. Pisumili peqataasut ulloq unnuarlu angerlarsimaffimmi najugaqartooreeraangata, taava taakku attavigineqartarput, ikiorseeqqinnissaq anguniarlugu, Martha Lund Olsen oqaluttuarpoq.
Kalaallit Nunaata Politiivi ilisimatitsipput aserorterinerit ataasiakkaarlugit paasiniaavigineqartut.
- Aserorterinermi peqataasimasut amerlanerit 15-it ataallugit ukioqaraluartut Kalaallit Nunaata Politiivisa kommuni qanimut suleqatigilluinnarpaa, ataasimoorluni aaqqiissutissanik suliaqartoqarniassammat Nuullu innuttaasunut toqqissisimanarnerulerniassammat - taamatullu meeqqat inuusuttuaqqallu akornanni pinerluttuliornerit toqqissisimajunnaartitsisut uninniassammata, Mikkel Svendsen oqarpoq.
NutaarsiassatDMI Tasiilami Kategori 2-mik sakkortussuseqartumik anorersuarnissaanik aarlerisaarivoq, 6. marsi 2024 nal. 09.00-imiit 7. marsi 2024 nal. 01.00-imut atuuttussamik. Anorersuaq sekundimut 25...
Aputit, nipilersortut ataatsimoornerillu nuannersut sammereerlugit ukioq manna Snow Fest sapaatip akunnerata naanerani naammassineqarpoq. Pisortatigoortumik ajugaasup...